Кеше Оралда жаңа Достық үйі ашылды
Еуразиялық ендікте орналасқан Орал қаласындағы жаңа құрылыс алаңдарының бірі тағы бір теңдесі жоқ сәнді де сәулетті ғимаратпен толықты. Бұл – кешегі бейсенбі күні достықтың туын жықпай келген барша батысқазақстандықтарға есігін айқара ашқан Достық үйі. Тақырыпқа шығарып отырғанымыздай, осындайда Абай атамыздың: «Сылдырап өңкей келісім, тас бұлақтың суындай», деген өлмейтін, өшпейтін өлең жолдары ойға оралады.
Бұл да нақ соның өзі. Нақ сол келісім. Нақ сол үйлесім. Батыс қақпаның солтүстік-шығыс жақ бөлігіндегі бірден көз тартатын жаңа ғимараттар – Салтанат сарайы, Қадыр Мырза Әлі атындағы мәдениет және өнер орталығы, оның алдындағы ақын ескерткіші, теннис корты, Назарбаев зияткерлік мектебі, күні кеше осы ғимараттардың қатарына сән түзеп қосылған Достық үйі тұтас бір ғажайып ансамбль құрайды.
Көк түстес күмбезбен көмкерілген ғимараттың сыртқы көрінісі мен ішкі интерьерінде шығармашылық және архитектуралық ұшқыр ойдың жемісі атойлап тұр. Достық үйінің жалпы аумағы 4,5 шаршы метрді құрайды. Бүгінгі күннің биік талғамына сай бой көтерген ғимарат құрылысын Орал өңіріндегі таңдаулы құрылыс компанияларының бірі – «ОтделСтрой» ЖШС тұрғызған.
Біз – шаңырағы ортақ елдің ұрпағымыз. Ортақ шаңырақтың иесі де, киесі де – еліміздің ынтымағы жарасқан сан түрлі этнос өкілдері. Бүгін түндігі түріліп отырған Достық үйі де бәріміздің ортақ шаңырағымыз. Сондықтан да, оның мәні мен маңызына және атқаратын рөліне ешқандай баға жетпейді. Құндылығына құрық бойламайды. Сыңғырлаған су жаңа ғимараттың ашылу рәсімі кезінде Батыс Қазақстан облысының әкімі Нұрлан Ноғаев сөз тиегін осы арнадан сабақтады.
Бұдан кейін сөз алған Қазақстан халқы Ассамблеясы Төрағасының орынбасары Ералы Тоғжанов бұдан біраз жыл бұрын Қазақстанға дәстүрлі діндер съезіне келген сапарында сол кездегі Рим Папасы Иоанн Павел II-нің Қазақстандағы сүттей ұйып отырған ауызбіршілікке қатысты айтқан бейнелі сөзін мысалға келтірді. Мәртебелі мейман: «Қазақстанды мызғымастай етіп ұстап тұрған, тіреп тұрған үлкен күш, ұлы күш – этностар мен ұлт өкілдерінің бірлігі. Олардың өзара татулығы.
Жас мемлекеттің мықтылығы да осында. Ал Қазақстанда құрылған Ассамблея – әлемдік деңгейдегі үлкен институтқа айналып отыр». Бұдан соң Ералы Лұқпанұлы республикада бой көтерген Достық үйлері жігерге жігер, күшке күш қосатын құрылым бола алатынын атап көрсетті. Оралда бүгінгі күні ашылып отырған Достық үйі соның бірі әрі бірегейі, деді ол.
Ғимарттың ашылу рәсімі кезінде орыс этномәдени бірлестігінің төрағасы Сергей Погодиннің өз сөзін қазақ тілінде бастағаны да қазақстандық біртектіліктің көрінісіндей әсер қалдырды.
Мұнда өңірдегі этномәдени бірлестіктердің офистері орналасып та үлгерген екен. Рәсімге қатысушылар мен меймандар, соның ішінде Бүкілқазақстан кәрістер қауымдастығының төрағасы Роман Пак Достық үйін аралап көрді. Ғимаратта достық пен бірліктің туын биікке көтеруді мұрат тұтқан этномәдени бірлестіктер мүшелерінің бәрі қазіргі әлемдік деңгейдегі ақпараттық технологияның барлық түрлерін емін-еркін пайдалана алады. Қысқасы, зерделі жанның жанына қажеттінің бәрі де мұқият ойластырылған.
Мәдени бірлестіктердің кабинеттері мен бөлмелері белгілі бір этнос өкілдерінің салт-дәстүрлер ерекшелігіне сай жабдықталған. Ал айнадай жарқыраған биік те еңселі, әрі аумағы атшаптырым конференц-залдар мен көрме-холлдар өзінің айшықты ажарымен кез келген адамды тамсандырып, таңдандыра алады. Сіз, мүмкін, дыбыстық жазу студиясының қызметін пайдаланғыңыз келетін шығар? Достық үйінде бұған да толық жағдайлар бар. Сондай-ақ, мұнда Батыс Қазақстан облыстық Қазақстан халқы Ассамблеясы бастамашы болатын сан-алуан іс-шаралар да өткізілмек.
Осылайша кеше Оралда Достық үйінің салтанатты түрде ашылуы бүкілхалықтық мерекеге әрі татулық тойына айналды. Достық үйінің аспан түстес көк күмбезі көгілдір көктемдей, жүректерді бір желпіндіріп өткендей әсер қалдырады. Сірә, бұл жалпақ дүниеде достыққа жетер күш, достыққа жетер құдірет бола қояр ма екен?!
Темір ҚҰСАЙЫН,
«Егемен Қазақстан».
ОРАЛ.
