Консепсьонның Қазақстанға сәлемі

Біз сан жылдар бойы Ақ үйдің символына айналып кеткен Консепсьон Пиччиоттомен 2010 жылдың сәуірінде кездес­кен едік. «Кездескен» дегені­міз де артықтау, дұрысы аты аңыз­ға айналған әжейдің өзі­нің үйреншікті тұрақты орнынан өзіміз тапжылмай барып, тауып алғанбыз. Мына сәй­кес­тікті қараңыз, дәл сол тұста Ва­шингтонда ядролық қауіпсіздік жө­нінде кезекті ғаламдық саммит өтіп жатқан болатын. Жаһандық жиында әлемнің әр қиырынан 47 елдің президенті мен халықаралық ұйымдардың басшылары бас қосты. Қазақ елінің Президенті Нұрсұлтан Назарбаев бастаған делегация құрамында біз де бар едік. Әлемдік саясаттың екі тізгін, бір шылбырын ұстаған Ақ үйдің қарсы алдында баяғыдай қас­қайып тұр еді кемпір. Жақындап келіп, жөн сұрастым. Сосын қарияны ыңғайыма тартып, шүйір­келесуді ойладым. Соның алғы сөзінде өзімнің ядролық қарудан өз еркімен саналы түр­де бас тартқан елден келіп отыр­ғанымды баян еттім. Кәсіби амалым алдамапты, оны естіген бойда әжейдің жүзі жылып сала берді. Бір риза болғаным, атомды залалын тәрк еткен Қазақ­стан туралы, оның Мемлекет бас­шысы Нұрсұлтан Назарбаев жайында Консепсьонның біраз мағлұматтары бар екен. Қолым­дағы «Washington post» газетінің су жаңа санындағы Елбасымыздың бейнесін көргені сол еді: «Мен оны білемін», – деп кішкентай жұ­­дырығынан бас бармағын шы­ғарды, жақынын көргендей жымиды. Сексен жасқа қарай аяң­даған қарттың жадының мық­тылығына тәнті болғанмын сонда. Осынау 35 жылда әжей Ақ үй­дің қарсы бетінде тұ­рып, бес президенттің зама­нын көріпті. «Рейганнан бастап, екі Джордж Буштың үл­­кені мен кішісін, соң­­ғысы Барак Оба­маның пре­зиденттік мерзімін көрдім. Олар­дың біреуімен де кездес­песем де, әлемнің әр тұсынан Ва­шингтонға қыдырыстап келген түрлі ұлт пен ұлыстармен кез­дестім, пікірлестім, суретке түс­тім. Бәріне өмірдің бас­ты құн­дылығы – бейбітшілік екенін ұғындырдым. Әлем хал­қы қақтығыссыз, қантөгіссіз, ұрыс­сыз, талассыз ғұмыр кешкеннен асылы жоқ. Мені қаншалықты түсінгенін білмеймін. Бірақ мен өзімді миссиямды орындағандай сезінемін. Соны қазақ жұртына айта бар. Қазақстанның ядролық қарудан бас тартқан бейбітсүйгіш Президенті мұны әу бастан-ақ түсініпті. Иә, ол көреген адам», – деді Консепсьон қоштасарда. Мен Консепсьонның қазақ еліне аманаттаған ізгі сәлемін жет­кіздім. Рас, ол АҚШ президент­терін көрген жоқ. Бірақ ақпарат құралдары, интернет беттері ар­қылы күні кеше ғана өмірден өткен кейуананың бейбітсүйер үндеулері әлемнің әр тарабына тарап жатты. Қанат ӘУЕСБАЙ. АСТАНА – ВАШИНГТОН –АСТАНА.