Қарағандыда адам ұрлағандар қолға түсті

ҚАРАҒАНДЫ. 15 ақпан. Қарағандыда ақша бопсалау мақсатында адам ұрлады деген айып тағылған күдіктілер қолға түсті. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлады. Күдіктілер 18 жастағы қала тұрғынын кепілге алып, оның ағасынан 350 мың теңге көлемінде ақша алған. Бұл оқиғадан хабардар болған полиция қызметкерлері жедел жоспар құрып, соның нәтижесінде «Мицубиси» автокөлігіндегі екі күдіктіні ұстады. Тінту барысында көліктің ішінен 12 колибрлі аңшы мылтығы мен жеті оқ, бейсбол таяғы, пышақ және ақша табылды. Екі күдіктінің сыбайластарын табу мақсатында тәртіп сақшылары олар тұрып жатқан пәтерге тінту жүргізді. Нәтижесінде ол жерден тағы да екі күдікті мен кепілге алынған жас жігіт табылды. Олар уақытша қамауға алынды. Қазір сотқа дейінгі тергеу амалдары жүріп жатыр. Қайрат Әбілдинов. Дерек: Қарағанды облысының ішкі істер департаментінің баспасөз қызметі. Сурет: lenta.ru.