Кәдеге асыру тиімділігі

Өткен жылы Қазақстанның Қарулы Күштерінде мемлекеттік қорғаныс тапсырысы шеңберінде 160 мыңнан аса артиллериялық оқ-дәрілер, 260 мыңға жуық қол гранаталары және 10 мыңнан аса инженерлік оқ-дәрілер кәдеге жаратылыпты. Оқ-дәрілерді пайдаға асыру үдерісі кәдеге жаратудың екі учас­кесінде – Арыс қаласы мен Отар стансасында жүргізіледі. Аталған жерлерде арнайы жабдықтар, оның ішінде модульдер бар. «Жабдықтың осы түрлерінде оқ-дәрілерді бөлшектеу, күкірт­терді ажырату, тротилды қорыту, я­ки оқ-дәрілерді алудан бастап толық бөлшектегенге дейін және әрі қарай іске асырылып, кәдеге жаратылатын өнімдер алуға дейін жүргізіледі және қаржы мемлекет бюджетінің кірісіне түседі. Сақталуы бойынша мерзімі өтіп кеткен оқ-дәрілер тиісті санатқа ауыстырылады және жоғарыда ай­тылған арнайы пункттерде кәде­ге жаратылады. Олардың ара­сында өткен ғасырдың 40-шы жыл­дарының соңындағы, 50-60-шы жылдардағы оқ-дәрілер де бар», – деді «Қазтехнология» АҚ кәдеге жарату департаментінің директоры Ербол Әлібеков. Кәдеге жарату әрі қарай қара және түсті металл ретінде іске асы­рылуы мүмкін материалдарды бөл­шектеу және алу әдісімен жүргі­зіледі. Күкірт пен тротил сияқты жарылғыш заттарды айыру бөлек іске асырылады. Мамандардың айтуынша, статистика бойынша кәдеге жа­ра­ты­латын оқ-дәрілердің саны жыл сайын арта түсуде. Техни­ка қау­іп­сіздігін сақтау мен жетілдіруге де аса мән берілуде. «Біз технологияны өзгертіп, оны жақсарттық. Күкірттерді ажырату әдісін біз әбден өзгерттік, жа­затайым оқиғалардың орын алу ықтималдылығы барынша азайтылды. Әртүрлі оқытуды жүр­гіземіз, қосымша жабдық, қорғаныс құралдары сатып алынуда, еңбекті күзету мен өндірістегі қауіпсіздік жөнінде мамандардың қосымша лауазымдары енгізілді. Кәдеге жарату бойынша шаралар барлық түрі бақыланып отырады», – деді Е. Әлібеков. Кәдеге жарату өнімдерін іске асыру нәтижесінде 2015 жылы рес­пуб­ликалық бюджетке 322 млн. теңге аударылғанын айта кеткен жөн. «Егемен-ақпарат».