Тәрбие жемқорлықтың тамырына балта шабады

Кеше Қайырбек Сүлейменовтің жетек­шілік етуімен «Нұр Отан» партиясы жанындағы Сыбайлас жемқорлыққа қарсы іс-қимыл жөніндегі республикалық қоғамдық кеңестің ағымдағы жылғы алғашқы отырысы өтті. Онда Сыбайлас жемқорлыққа қарсы іс-қимыл бағдар­ламасын жүзеге асыру жөніндегі 2015 жылғы іс-шаралар жоспарының орындалу нәтижелері талқыланды. Алқалы жиында негізгі баяндамашыдан бөлек Білім және ғылым мен Мәдениет және спорт министрліктерінің, партияға қарасты ұйымдар мен «Жас Отан» жастар қанатының өкілдері сөз алып, тақырыпқа қатысты мәселелер төңірегінде ой өрбітті. Сондай-ақ, жемқорлықтың алдын алудағы мемлекеттік органдар мен қоғамдық ұйымдардың белсенділігі, жастар ұйымдарымен тәрбиелік жұмыстардың жүргізілу қарқыны да айтылды. Халықтың жемқорлыққа қарсы мәдениетін қалыптастыруға қатысты қол­ға алынған шараларға тиісті бағалар берілді. Отырыста «Нұр Отан» партиясы мүше­лерінің алдына жемқорлықтың алдын алу үрдісіне дендей қарау, бастауыш партия ұйымы, қоғамдық құрылымдар мен партияның барлық деңгейіндегі бөлімдер қызметін нығайту мәселелері күн тәртібіне шығарылды. Оған қоса, жемқорлыққа қарсы жаңа заң қабылдаудың маңыздылығына, «100 нақты қадам» Ұлт Жоспарын тиімді түрде іске асыруға, мемлекеттік органдар жанынан қоғамдық кеңестер құруға, партия Төрағасы Н.Назарбаевтың жемқорлыққа қарсы мемлекеттік саясатына қатысты тапсырмаларын жүзеге асыруға баса мән берілді. Нұрлыбек ДОСЫБАЙ, журналист.