Қожалықтарды қаржыландыратын қауымдастықтың қолы ұзарады

Астанада «Агроөнеркәсіп кешеніндегі несиелік серік­тестіктер қауым­дастығы» заңды тұлға­лар бірлестігінің құ­рылтайшылары мен «ҚазАгро» холдингі және «Аграрлық несие корпорациясы» АҚ өкілдерінің қатысуымен жалпы жиналыс болды.  Онда 15 жылдан бері еліміздің ауыл шаруашылығын дамытуда тынымсыз тер төгіп келе жатқан несие серіктестіктері қызмет ауқымын ке­ңейтіп, өз қатысушыларын несие­леуге жасаған жаңа жүйенің әлі де ширатылатын және жетілдіріле түсетін тұстарын жан-жақты талқылады. Шараның дөңгелек үстел форматын­да өткен бөлімінде жаңа жүйені таныстырған қауымдастық төрайымы Альмира Сағатоваға үш тараптың же­­текші мамандары түрлі сұрақтар қойып, ол шар­уа қожалықтарын қаржы­ландырудың жаңа жүйесіндегі пайдалы тұстарды мақұлдап отырды. Әр істе шашыраңқы әрекет етіп жүр­ген қожалықтардың басын бірік­тіріп, қаржыландыру мен ауыл шаруашылығына қажетті заттармен дер шағында қамтамасыз ету істерін үйлестіретін жаңа жүйе тарап­тардың ойын дөп басқан сияқты. Себебі, жаңа жүйе әрісі Германия мен Польшаның, берісі Ресей мен қырғыз елінің саладағы қаржыландыру тәжірибелерін зерделей отырып, өз елімізге пайдалы тұстарын іріктеп алып жасалғаны көрініп тұр. «Бұл жерде Германияның тәжірибесіне көбірек назар аударып, тиімді жерлерін үлгі еткеніміз жөн деп білемін. Өйткені, құрылғанына жүз жылдан асқан кор­­порация қазіргі таңда тек ауыл шаруашылығын ғана несиелеумен шектеліп қалмай, елдегі экономиканың өзге де салаларын қамтып жатыр. Біз де алдымызға осындай үлкен мақсат қойып, әрекет етсек жөн болар еді. Ондай биік мақсатқа құлаш ұруға мемлекет жол ашып, барлық дерлік жағдайды жасап отыр. Ендігі қалған іс – жүйені барынша жетілдіріп, ауыл шаруашылығындағы жұртты бір мақсатқа жұмылдыра білу және жаңа жүйеміздің жемісін қысқа уақытта елге ұсына алу», деді төрайым. Күн бойына ұласқан шарада қауым­дастықтың өткен жылғы жұмыс қоры­тындылары мен алдағы кезеңге арналған жоспары пысықталды. Сөй­тіп, таяу уақыт­та мемлекеттік органдар мен мүдделі құры­лымдардың талқылауына шығарылатын несие серіктестіктерін дамытудың ай­тылған жаңа стратегиясы ұтымды ұсыныстармен толықтырылды. Жалпы 15 жыл ішінде «Аграрлық несие корпорациясы» АҚ қолдауымен еліміздің 13 облысындағы 163 ауданда 171 несие серіктестігі құрылыпты. Олардың аудандарды қамту үлесі республика бойынша 93 пайыздан асқан. Дәл бүгінгі күні НС жүйесі 12 мыңға жуық ауылшаруашылық тауар өндірушілерінің басын бірік­тіріп отыр. Былтырдың өзінде серік­тестіктің қатарына 2240-тан астам жаңа қатысушы тартылыпты. Осы кезге дейін НС жүйесіне келген қожа­лықтарға 160 млрд. теңгеден астам несие ақша беріліп, 120 мыңға жуық ауыл шаруасының жұмыс орны сақталып, қосымша қызмет көздері ашылған. Қауымдастық жетекшісі Альмира Саға­това­ның пікірін алға шығарар болсақ, серіктестіктің бүгінгі үлкен мақсаты – НС жүйесінің стратегиялық даму бағдарламасын озық елдердің саладағы тәжірибесі негізінде жасап, уақыт талабына сай дамытуды көз­дейді. Ол үшін НС-тың бірыңғай стандарттары мен ережелерін енгізбек. Сондай-ақ, ауыл шаруашылығы коо­пе­ративтерін дамытумен қатар, несиелеу бюросына қатыс­пақ. Бұлар­мен бір­ге қожалықтар арасында ынты­мақтастыққа бағытталған сақ­тандыру қорларын қа­лып­­­тастыруды жоспарлап отыр. Құ­рылымдағы жалпы жиынның соңы мерекелік шараға ұласты. «Аграрлық несие корпорация­сы» АҚ жетекшілері құрылғанына 15 жыл толған НС жүйесінің қатысу­шы­ларына грамоталар тапсырды. НС рейтингілеу жүйесі бойынша Ақмола облысындағы «Целиноград» НС пен Сол­түстік Қазақ­стан өңіріндегі «Есіл» НС көш­басшы деп танылды. Ал өткен жылдың қо­ры­тындысы бойынша ең үздік серіктестік жүлдесі Оңтүстік Қа­зақ­стан облысындағы «Яссы-несие» НС-қа берілді. Нұрбай ЕЛМҰРАТОВ, «Егемен Қазақстан».