Шетелде білім алу шеберлікті шыңдайды

Кеше Президент жанындағы Орталық коммуника­ция­лар қызметінде «Тұлғалық капиталды дамыту­дың басымдығы ретінде шетелде кадрларды даярлау» тақырыбында брифинг өтті. Білім және ғылым вице-министрі Т.Балықбаев, «Ха­лықаралық бағдарлама­лар орталығы» АҚ президенті Ғ.Нығ­метов, «Болашақ» халық­аралық стипендиясының түле­гі Н.Сағынова қатысқан жиында білім берудің бәсекеге қа­білеттілігін арттыру және «Болашақ» халықаралық сти­пен­­диясын дамытудың 2016-2020 жылдарға арналған жос­­­­парын іске асыру, сонымен бірге, оған үміткерлерді іріктеу ережелеріне енгізілген өзгерістер туралы сөз қозғалды. Вице-министр Т.Балықбаев атап өткеніндей, 2015 жылы Шетелде кадрлар даярлау жө­­ніндегі республикалық ко­миссияның шешімімен «Бо­лашақ» стипендиясы 601 үміт­керге тағайындалған, оның ішінде 439 магистратура, 40 докторантура, 122 тағылымдама бойынша. Бүгінгі күні бағдарламаның 503 түлегі мемлекеттік құры­лымдарда, ұлттық және жеке компанияларда, білім және денсаулық сақтау ұйымдарында маңызды стратегиялық ше­шім­дер қабылдау деңгейінде­гі жоғары басқарушылық буында қызмет етуде. Олардың қатарында 4 вице-министр, 5 әкім, 3 республика облыстары мен қала әкімдерінің орынбасарлары бар. Басқасын айтпағанда, осылардың өзі шетелде білім алған жастардың білік­тілік дең­гейін аңғартса керек. «Болашақ» бағдарламасын дамытудың 2016-2020 жыл­дарға арналған жоспарына сәйкес, «ЖОО түлегі» санаты алынып тасталып, магис­тратураға «Инженерлік-тех­никалық қызметкер» жаңа санаты енгізілді. Үміткерлер дип­ломының орташа балы GPA 4.00 болуы тиіс, ол бұрынғы 2.67-ден 3.00-ге көтерілді. Сонымен бірге, ағылшын тілін білу дең­гейіне де талап күшейтілді. Дәлірек айтсақ, IELTS 4.0-ден 5.0-ге артты. Үміткерлердің жұмыс өтіліне деген талаптар да өзгертілді. Магистратура мен докторантураға тапсыру үшін жұмыс өтілі кемінде 2 жыл болуы тиіс. Осы және өзге де үделерден сүрінбей, Рес­пуб­ликалық комиссияның тал­қысынан мүдірмей өткен үміткер аталмыш бағдар­лама­ның стипендиаты аталмақ. Рауан ҚАЙДАР, «Егемен Қазақстан».