Жауапкершілік жүгі зор

Олег Фролов – «Өс­кемен қалалық Ауған соғы­сы ардагерлері ұйы­мы» қоғамдық бірлестік кеңе­сі төрағасының бірін­ші орынбасары. Жуырда Олег Геннадьевич «Нұр Отан» партиясының атынан №15 сайлау округі бо­йынша Өскемен қала­лық мәслихатының де­пу­тат­тығына канди­дат­тыққа ұсынылды. Ағымдағы жы­лы 2 ақпанда өткен праймеризде пар­тияластарының қолдауына ие болып, 9 ақпанда өткен партияның қалалық конференциясында алдағы сайлауға түсу үшін партиялық тізімге енді. – Бұл – мен үшін үлкен мәртебе. Елбасы жүктеген міндеттер ме­же­сінен табылып, әлемнің дамыған 30 елінің қатарына қосылу үшін тынбай еңбек етуіміз тиіс. Мәслихат депутаттарының алдында Жаңа Экономикалық Саясат шеңберінде бюджет қаржысының тиімді жұмсалуын бақылау және дағдарысқа қарсы бағдарламаларды жүзеге асыру міндеті тұр. Яғни, қаламыздың гүлденуі жолында және сайлаушылар сеніміне ие болу үшін аянбай еңбек ету керек, – деді Олег Фролов. Қазақстанның жаңа дәуірге бет алғанын айт­қан үміткер қалалық мәс­ли­хаттың өткен шақыры­лымында өскемендік интернационалист-жауынгерлерге емдеу-сауықтыру шаралары тұрғысынан көп көмек көрсетілгенін жеткізді. Айталық, Ауған соғысының ардагерлері Астана мен Алматы емханаларында емделіп, Выдриха ауылындағы Уба шипажайында денсаулықтарын түзеп келеді. Ұлы Отан соғысының ардагерлері мен оларға теңестірілген тұлғаларды әлеуметтік қорғау туралы заң аясында 15 ақпан күні 50 мың теңге көлемінде материалдық өтемақы төленуде. Сондай-ақ, соңғы 8 жылда Ауған соғысының ардагерлеріне 60 мың теңге көлемінде коммуналдық қызмет үшін жеңілдік жасалып отыр. 2015 жылы облыс орталығындағы мектептерде 40-тан астам ерлік сабағы мен 2 әскери-патриоттық ойын өткенін де айта кеткен ләзім. Думан АНАШ, «Егемен Қазақстан». ӨСКЕМЕН.