Әріптестікке әзір

«Бірлік» саяси партиясы мен «G-Global» «Жасыл экономика» және даму үшін» коалициясы өкілдерінің кездесуі өтті. Кездесуде сөз алған «Бірлік» партиясының мүшесі Асқар Сыздықов «Жасыл экономика» тек қоршаған ортаның таза, ал адам денсаулығының мықты болуы үшін ғана маңызды емес екенін жеткізе келе былай деді: «Бұл біздің кәсіпорындардағы, коммуналдық объектілердегі, көліктердегі және тағы басқа шығындарымызды бірнеше есеге азайтуы мүмкін. Демек, бұл бір жағынан қаржыны үнемдеу үшін де қажет. «Жасыл экономика» әлемнің жаһандық нарықтарында біздің тауарларымыз бен қызметтерімізді бәсекеге қабілетті етеді». «G-Global» «Жасыл экономика» және даму үшін» коалиция­сы басқармасының төрайымы Салтанат Рахым­бекова өз сөзінде «Жасыл эко­но­миканың» имид­жі Қазақстанның әлем жұртшылығы алдын­дағы инвестициялық тартым­дылы­ғын арттыруға ықпал ететінін айтты. «Бүгінде дамыған ел­дердегі тұлғалар, саясаткерлер, ірі бизнесмендер, ғалымдар, шығармашыл азаматтар «жасыл экономиканың» дамуына айрықша көңіл бөле бастады. «Жасыл экономика» химия мен биология, механика мен сандық технологиялар, математика мен физика, роботты техника мен әлеуметтік ғылымдар саласындағы кадрларымыздың сауаттылығын арттыруға қозғау салып, түрткі болады. Жақын болашақта мұндай кадрлар барынша көп сұранысқа ие болмақ», – деді ол өз сөзінде. Ал «Ақбота» қоғамдық бір­лес­тігінің төрайымы Татьяна Немцан «жасыл экономиканың» азаматтарды сапалы азық-түлікпен қамтамасыз етуге жә­не оны экспорттау арқы­лы жақсы кіріс алуға мүмкін­дік беретінін жеткізді. «Эко­но­микалық жағынан пайда әкелу мақсатында көптеген ірі шетелдік компанияның Қазақ­станның «жасыл экономика­сына» барынша назар аударуға дайын екендігінің өзі оған қосымша тартымдылық береді. Қазақстанның бұл салада аз ғана күш-жігер жұмсап, айтар­лықтай нәтижеге қол жеткізуіне мүмкіндігі бар», – деді өз сөзін­де ол. «Біздің партиямыздың не­гізгі қағидаттарының бірі – экологиясы таза орта қа­лып­­тастыру. Таза ортаны, таби­ғатты болашаққа аманаттау. Сон­дықтан, «G-Global» коали­циясымен бірлесе отырып, елімізге «жасыл экономиканы» енгізу бойынша бірлесе жұмыс жүргізгіміз келеді. Мәселен, бүгінде таза көкөніс өнімдерін өсіру, электр энергиясын тиімді пайдалану, көмірді 60 пайызға дейін үнемдейтін технологияларды, биотехнологияларды, тамшылатып суару жүйесін енгізу бойынша іс-шаралар қолға алынып жатыр. Біз осы арқылы Қазақстанның экономикасын дамытуға мүмкіндік аламыз деп ойлаймын», – деді «Бірлік» саяси партиясы төрағасының орынбасары Төлеген Қуанышев. Ләйла ЕДІЛҚЫЗЫ, «Егемен Қазақстан».