Сәуірде Сенат тыңдау өткізеді

Биылғы сәуір айында Сенатта «Еуразиялық экономикалық одақ және Дүниежүзілік сауда ұйымы жағдайында отандық аграрлық сектордың бәсекеге қабілеттілігін арттыру – заңнамалық реттеу және оны тәжірибелік тұрғыдан іске асы­ру» тақырыбында парламенттік тыңдау өтетін болды. Бұл ту­ралы шешім 15 ақпанда болған Сенат бюросында қабыл­данды. Палата Төрағасы Қасым-Жо­март Тоқаев атап өткендей, парла­менттік тыңдаулар қабыл­данған заңдардың іске асырылу ба­рысы туралы жан-жақты және толық ақпарат алып, түйінді мәсе­лелерді терең зерделеуге мүмкін­дік береді. «Өткен жылы Ұлт Жос­пары шеңберінде ауыл шаруа­шылығын жандандыруға бағыт­талған бірқатар заңдар қабыл­данды. Сол заңдардың орын­далу барысы әрдайым депутат­тардың назарында болуы қажет. Соны­мен қатар, еліміздің Еуразиялық экономикалық одақтағы және Дүниежүзілік сауда ұйымындағы мүшелігі жағдайында агро­өнер­кәсіптік кешеннің бәсекеге қабілеттілігін қамтамасыз ету өзек­ті мәселелердің бірі болып табылады», – деді Қ.Тоқаев. Парламенттік тың­дауды өткізуді ұйымдастыру Аг­­рарлық мәселелер, табиғатты пай­­далану және ауылдық ау­мақ­тар­ды дамыту комитетіне жүк­телді. Сенат бюросы жоғарғы пала­таның 2016 жылғы 18 ақпанда бо­латын кезекті отырысының күн тәртібін де келісті. Бюрода, сондай-ақ, Үкіметтен келген заң жобалары Сенаттың тұрақты комитеттеріне бөлінді. Конституциялық заңнама, сот жүйесі және құқық қорғау органдары комитеті Адамдардың реадмиссиясы туралы Қазақстан мен Норвегияның үкіметаралық келісімін ратификациялау туралы заң жобасы бойынша бас комитет болып белгіленді. Ал Қаржы және бюджет комитетіне Қазақстан Үкіметі мен Халықаралық көр­мелер бюросы арасындағы Аста­на қаласында ЭКСПО-2017 халық­аралық мамандандырылған көрме­сін өткізуге байланысты ресми қатысушыларға арналған жеңіл­діктер мен преференциялар туралы келісімді ратификациялау туралы заң жобасын жүргізу тапсырылды, деп хабарлады Парламент Сенатының баспасөз қызметі.