«Жаңғақ тал»

Франциядағы кинофестивальдан екі бірдей жүлдемен оралды Соңғы уақытта Шәкен Айманов атындағы «Қазақфильм» киностудиясы түсірген картиналардың ішінде «Жаңғақ тал» фильмі кө­ңілге жылы шуақ ұялататын жақ­сы туындылардың қатарынан табылған еді. Кинематография саласынан хабардар жандар өткен жылы режиссер Ерлан Нұрмұхамбетовтің осы «Жаңғақ тал» фильмі Ко­рея­дағы Пусан фестивалінде көр­сетіліп, әлемдік премьерасы жүр­генін бі­леді және ол сол додада да New Currents («Жаңа ағым») секциясы аясында жүлдеге ие болған-ды. Енді, міне, қазақстандық кинокартина Везульде өткен (Франция) Азия киносының ХХІІ халық­аралық кинофестивалында екі бір­дей жүлдеге ие болды. Режиссер Ерлан Нұрмұхамбетовтің картинасы халықаралық қазылардың арнаулы жүлдесі мен кино сын­шыларының арнаулы жүлдесін жеңіп алды. Везульдегі бұл кинофестиваль Францияда ғана емес, Еуропада көптен бері өткізіліп келе жатқан ауқымды азиялық кинофорум болып табылады. Оңтүстік Қазақстан облы­сының Ленгір қаласында түсі­ріл­ген «Жаң­­ғақ тал» фильмі – кә­дімгі отба­сылық қарым-қаты­нас­тарға құ­рылған туынды. Ірік­теу комиссия­сы конкурстық көр­сетілім үшін атал­мыш картинаны үздік азиялық кинотуындылар арасынан таңдап алған болатын. Фестиваль аясында француз кө­рермендеріне ұсынылған «Жаң­ғақ тал» фильмінің көрсе­тіліміне режиссер Ерлан Нұрмұхам­бетов­тің өзі де қатысқан. Қазақстандық туындыға бәсе­келес ретінде Қытай, Жапония, Оң­түстік Корея, Иран, Филиппин және Түркия елдерінің 8 кинокартинасы ұсынылған. Солардың ара­сында жеңіп шыққаны – «Жаңғақ тал». Ал фестиваль аясында бар­­лығы 90-нан астам фильм көрсе­тілген. Айнаш ЕСАЛИ, «Егемен Қазақстан». Алматы.