Балалар қуанатын болды

Алматы қаласының тілдерді дамыту басқармасы ҚР Тілдерді қолдану мен дамытудың 2001-2010 жылдарға арналған мемлекеттік бағдарламасы бойынша 2010 жылы шығарылған баспа және электронды өнімдердің тұсаукесерін өткізді. Шара бары­сын­да жұртшылық биылғы жылы жарық көрген балаларға ар­налған аудиокітаптармен, анимациялық фильмдермен, ресми іс қа­ғаздарының мемлекеттік тілдегі үлгілерімен, электронды нұс­қаларымен, салалар бойынша терминдік сөздіктермен, тілдескіштермен танысты. – Бұл аудиокітаптар мектеп оқушыларының сұранысын қа­нағат­тандыру мақсатында жарық көріп отыр. Республикада тұңғыш рет 3D-форматындағы графи­ка­лық тәсілмен жасалған анима­ция­лық мультфильмнің басты ерекшелігі – оның ұлттық құнды­лық­тарды насихаттауында. Соңғы заманауи техникалық құралдардың мүмкіншілігімен жасалған мульт­фильмнің бүлдіршіндерге мемлекеттік тілді үйретуде, тіл ұстар­туда ықпалы айрықша болмақ», – деп атап өтті қалалық Тілдерді дамыту басқармасының бастығы Ахетов Мамай. Оның айтуынша, ертеңнен бастап аталмыш кітаптар қаланың барлық кітап­ханалары мен балабақшаларына тегін таратылатын болады. Жиын барысында Алматы қаласы Тілдерді дамыту бас­қармасының тапсырысымен жа­сал­ған әрқайсысы 16 сағаттық «Асыл сөз», «Шәкірттерге шашу» атты қазақ әдебиетінің үздік үлгі­лерінен құралған аудиокітаптар да таныстырылды. Тұсау­ке­серде сонымен қатар, кәсіби салалар бойынша жарық көрген терминдік сөздіктер мен тілдескіштер, іс құжаттарының үлгілері енгізілген кітаптар, сондай-ақ 30 сериядан тұратын «Алдар Көсенің көңілді оқиғалары» атты анимациялық мультфильм де көпшілік на­за­ры­на ұсынылды. «Тәрбиелік мәні зор бұл туын­дылар жеткіншектер зердесін дамытып, сөйлеу мәдениетін қа­лып­­тастыруға ықпал етері сөзсіз», – дейді Алматы қаласы әкімдігі Ішкі саясат басқар­ма­сының бастығы Кенжехан Маты­жанов. Оның айтуынша, кәсіби салалар бойынша жарық көрген терминдік сөздіктер мен тілдескіштер, іс құжаттарының үлгілері мем­лекеттік мекемелер мен ұйым­дарға әдістемелік көмек ретінде берілмек. Гүлзейнеп СӘДІРҚЫЗЫ.