Атырау облысында 69 өтініштің мүлігі жария етілді

АТЫРАУ. 18 ақпан. Атырау облысының Жылыой ауданында мүлікті жария етуге байланысты 80 өтініш тіркеліп, оның 69-ы бойынша оң шешім шығарылды. Бұл туралы egemen.kz тілшісі хабарлады. Жылыой аудандық мүлікті жария етуді өткізу жөніндегі комиссияның мәліметінше, жұртшылықтың көпшілігі жеке тұрғын үйді заңдастыру, үйінің қасынан салынған монша, тұрғын үйді жалғастыру қосымша құрылысы, қайта жоспарлау, гараж, қойма, дүкен, фото-бейне студио ғимараттар сынды қосалқы ғимараттарды заңдастыру мәселесімен кеңес алады. Комиссия мүшелері 2014 жылдың 1 қыркүйегінен бастап осы уақытқа дейін 543 тұрғынға тиісті мағлұматтар берген. Соның ішінде 80 өтініш тіркеліп, 69 өтінішті жария ету үшін оң шешім шығарылыпты. Бір өтініш заңдастыруға жататын мүлікке (ғимаратқа) тиісті сарапшының қорытындысы болмауына байланысты кері қайтарылды, ал 10 өтініш әлі де комиссия отырысында қарастырылуда. Жоғарыда көрсетілген өтініштер бойынша 69 тұрғын үй нысанының сомасы 306 млн. 230 мың теңгені құраған. Сонымен бірге, 64 тұрғын емес нысандар құны 27 млн. 890 мың теңгеге бағаланған. Одан бөлек, 173 млн. 304 мың теңгені құрайтын 41 коммерциялық нысанға жататын мүлік жария етілді. Жолдасбек Шөпеғұл. Дерек: egemen.kz. Сурет: syrboyi.kz.