АҚШ президенті араға 80 жыл салып Кубаға аяқ басқалы тұр

АЛМАТЫ. 18 ақпан. АҚШ президенті Барак Обаманың алдағы апталардың бірінде Латын Америкасы елдеріне сапарының барысында Кубаға да аялдамақ ойы бар. Егер бұл миссия орындалар болса,  Құрама Штаттарының президенті Бостандық аралына 80 жылдан соң бірінші рет аяқ басқалы тұр. Бұл туралы bbc.com сайтына сілтеме жасаған egemen.kz тілшісі хабарлады. Сапар наурыз айының 21-22 күндері Аргентинаға барардың алдына қойылған. Кубаға жолы түскен жалғыз президент Калвин Кулидж Құрама Штаттардың атынан аралға 1928 жылы барған екен. Сол кезде Кулидж Куба президенті Херардо Мачадомен жүздескен. 2002 жылы Бостандық аралына Джимми Картердің жолы түсті. Бірақ ол кезде Картер АҚШ президенті қызметінде емес еді. Барак Обама 2014 жылы АҚШ Конгресіне Кубамен байырғы еларалық қатынасты қайта орнату туралы ұсыныс жасаған. АҚШ президентінің сайлау науқаны тұсындағы Барак Обаманың бұл сапарын республикалықтар бірден жақтырмай қалған. Олар Америка Құрама Штаттарының президенті ол елге қазіргі Кубадағы  Кастроның  әулеті биліктен кеткенде ғана бару керектігін алға тартуда. Талғат Сүйінбай. Дерек: bbc.com Сурет: ria.ru.