Өнеге мектебі

Елордада Мәдениет және ақпарат министрлігі тапсырысы бойынша түсірілген «Сағадат Нұрмағамбетов. Соңғы сұхбат» деректі фильмінің премьерасы өтті. Фильмнің аты айтып тұрғандай, экрандық туынды Кеңес Одағының Батыры, тәуелсіз Қазақстанның тұңғыш Қорғаныс министрі, армия генералы, Халық Қаһарманы Сағадат Нұр­ма­ғам­бетовтің өмірі мен өнегелік мектебі туралы баяндайды. «Біртуар сардардың беймәлім қырларын ашуға көбірек мән берілген туынды көпшілікке ұнауы тиіс. Қайраткердің әдебиет пен өнерге деген сүйіспеншілігі, отбасы құндылықтарын қорғаудағы шынайылығы кейінгі өсіп келе жатқан жас ұрпақ үшін қашанда үлгі болып қала береді. Мұндай қайталанбас тағдырлар туралы ешқашан ұмытпауға тиіспіз. Осы орайдағы идеямызды ойдағыдай жүзеге асыра алдық деп есептеймін» деді фильмнің режиссері Сатыбалды Текеев журналистерге берген сұхбатында. Деректі картина тұлғаның лейтенант-майдангерден қол­басшылыққа дейінгі өмір жолы, Қазақстан Қарулы Күш­те­ріндегі көп жылғы қызметі туралы баяндайды. Туындының басым бөлігі режиссердің кейіпкермен болған біраз жылдар бұрынғы соңғы сұхбатын қамтиды. Тағы бір айта кететін жайт, премьералық көрсеті­лімді Қарулы Күштер ардагерлері кеңесінің жетекшілері мен мүшелері, екінші дүниежүзілік соғыс пен ауған соғысының ардагерлері, басқа да тұлғалар келіп тамашалады. «Мен танымал тұлғаның шынайы бейнесі өрілген деректі фильмнің авторларына ризашылығымды білдіргім келеді. Әсіресе, келешек Отан қорғаушылар мен жас әскерилер үшін мұның пайдасы мен тәрбиелік мәні ұшан-теңіз. Және де картинаны Сағадат Нұр­мағамбетовтің өмірі туралы алдағы түсірілетін фильмдер мен шығармалардың басы деп санаймын. Оның өмірлік тәжірибесі бізге қашанда өнеге мектебі болып қала бермек», – деді запастағы генерал-лейтенант, Халық Қаһарманы Бақытжан Ертаев. «Егемен-ақпарат».