Сайлаушылармен салиқалы әңгіме

«Ауыл» халықтық-демократиялық патриоттық партиясы өзінің сайлау науқанындағы үгіт-насихат жұмыстарын жүйелі түрде жалғастыруда. Мәселен, кеше «Ауыл» партиясы республикалық қоғамдық штабының мүшелері Көкшетау қаласына барып, сайлаушылармен кездесу өткізді. «Ауыл» партиясының белсенділері Көкшетау қаласындағы аспаздық-кондитерлік өнім шығаратын «Ленев» жеке кәсіпкерлігінің тыныс-тіршілігімен танысып әрі осы өндіріс орнындағы еңбек ұжымымен салиқалы әңгіме құрды. «Ауыл» партиясының мүшелері кәсіпорын қызметкерлеріне «Ауыл дәстүрін жаңғыртамыз» атты сайлауалды бағдарламасын түсіндіріп, оның негізгі басым бағыттарына тоқталды. «Елбасы Нұрсұлтан Назарбаев ха­лық­қа «Мәңгілік Ел» ұлттық идеясын жария етті. Біздің партиямыздың да бас­ты мақсаты – халықтың дәстүрлі құн­ды­лықтарын дамыту, Отанымыз – Қазақ­станның тәуелсіздігін бекемдей түсіп, «Мәңгілік Елді» нығайту», – деді «Ауыл» партиясының төрағасы Әли Бектаев. Одан әрі спикер бірқатар өзекті мә­селелер жөнінде сөз қозғай келіп, ауыл­шаруашылық өнімдерін несие­леу және субсидиялау шараларын жетіл­діру, ауылшаруашылық өнімдерін өндіру, өңдеу, сақтау және тасымалдауға ар­налған, ауылшаруашылық тауар өн­ді­ру­шілеріне сервистік және несиелеу қыз­метін көрсететін кооперативтерді құ­руды ынталандыру және басқа да жағ­даяттарды атап көрсетті. Ал «Бизнестің жол картасы-2020» бағдарламасы бойынша мемлекеттен субсидия алып, соның арқасында өрісін кеңейте түскен «Ленев» кәсіпорны жоғары сапалы кондитерлік, нан-тоқаш өнімдерін шығаратын заман­ауи жабдықтармен қамтамасыз етілген. Бұл аспаздық-кондитерлік цехтың дайындайтын өнімдері жергілікті халық арасында сұранысқа ие, көпке танымал. Өндіріс орны басшысының айтуынша, бүгінгі таңда мемлекет бизнесті дамыту бағытында ауқымды шаралар атқарып келеді. Соның арқасында шағын кәсіпкерлер ісінің өрісін кеңейтуге мол мүмкіндіктер туып отыр. Ал кәсіпорын еңбеккерлері: «Біз жергілікті, әсіресе, ауылдық жерлерде бизнестің қарқынды дамығанын қалаймыз. Себебі, бұл аймақ халқын жұмыспен қамтып қана қоймай, нарықтағы отандық өнім көлемін арттырады», – деп есептейді. Жиын барысында «Ауыл» партия­сының өкілдері табыстың көзін таба біл­ген, мемлекет берген мүмкіндікті қалт жібер­мей пайдаланып, бүгінде нарықтан өз ор­нын тапқан кәсіпорын ұжымына сәттілік тіледі. Жолдыбай БАЗАР, «Егемен Қазақстан». КӨКШЕТАУ.