Марқасқа

Жарықтық Мұхаңнан, қайран Мұқағали Мақатаевтан сөз қалып па еді?! Бір өлеңінде былай деп төгілдірмеуші ме еді: «Бұл қа­зақ­та жігіттер бар марқасқа, Жар­қылдаған алмастай...». Ар­қа­лы ақын өте дұрыс айтқан. Бұл қазақта жарқылдаған алмастай марқасқа жігіттер жеткілік­ті. Намысты қол­дан бермейтін, ісі мен сөзінің арасында айырма жоқ, тіпті, құрғақ сөзден гөрі, іске бейім тұратын, жұмыс десе жанын беретін жігіттер мен ұлдар аз емес. «Сүйер ұлың болса сен сүй, сүйінерге жарар ол», деп Абай ата­мыз да тектен-тек айтпаса керек. Міне, елі дәл осындай өршіл өрендерін ғана нағыз ұлым дер. Немесе нағыз ұлдары ғана терең отаншылдық сезіммен, міне, менің елім дер. Міне, менің жерім дер. Міне, егемен елім, жазира жерім дейтін нағыз ұлдың бі­рі, Сырым елінің ортан қол­дай аза­маты, жеке кәсіпкер Бей­біт Та­хамбетов десек сірә да қате­лес­пейміз. Оның басты өмірлік ұстанымы – еңбек. Өзінің осы ақ-адал еңбегі арқылы еліне пайдасын тигізу. Бүгінде тапқан пайдасы өзінің қара басынан артыл­майтындар аз емес. «Ақсұңқар жемін ша­шып жейді, құзғын жемін басып жейді», дейді халқымыз. Біздің бүгінгі кейіпкеріміз «жемін ша­шып жейтін» ақсұңқар тектес азамат. Ол еңбек десе, жұмыс десе бә­рін де жолға қалдыруға, қонаққа да, тойға да бармауға, тіпті, ұйық­та­­мауға да әзір. Өйткені, уақытты бос­қа жою Бейбіт үшін қасіретпен тең. Жалпы, Сырым еліндегі Та­хам­бетовтер әулеті жапырағы жа­­йыл­­ған әулет. Бейбіт – көп ба­лалы отбасында туып-өскен. Әкесі Едірес пен анасы Дәмелі перзенттерінің бәрін еңбек етуге тәрбиелеп өсірді. Еңбек қылмай тапқан мал дәулет болмайтынын бала кездерінен ұғын­дырды. Бүгінде Бейбіт Самара – Шым­кент халықаралық автожолы бо­йындағы автокөлік иелері мен жо­лаушыларына және өз ауылдас­тарына көптеген пайдасын тигізіп отырған кәсіп иесі. Ол аталған халықаралық жол дәлізінің бойынан үлкен қала­лар­дағы үш жұлдызды отельден бір мысқал кем түспейтін қос қабатты қонақ үй құрылысын көтеріп, ой­­дағыдай аяқтап шық­ты. Оған «Алашорда» деген атау қойғанды жөн көрді. Бі­реулер үлкенді-кішілі жеке нысандарына, дүкендері мен кафелеріне әкесі мен атасының немесе руының атын қойып жатады. Ұл-қыздарының есімін де маң­дайшаға жазатындар бар. Мен олай жасағым келмеді. Алаш­орда – елдің тарихы. Оның кө­семдері тәуелсіздікті ту етіп кө­тер­ді. Батыс Алашорда же­тек­шілері Жаһан­ша және Ха­лел Досмұхамбетовтер осы Жымпиты жерінде тұңғыш қазақ құрылтайын өткізді. Бабалар жете алмаған тәуелсіздікке біз жетіп отырмыз. Дегенмен, алашор­да­шылар көтерген тәуелсіздік идея­сы қай кезде де баға жетпес саяси құндылық болып қала бермек. Сондықтан да, маңдай термен тұр­ғызылған қонақ үйдің атауын «Алашорда» деп қойдым. Бұл әрі өзімізді өзгелерге таныта білудің бір жолы, деп толғанады Бейбіт бауы­рымыз. Екіншіден, Бейбіт Едіресұлы жылыжайда қияр және қыза­нақ секілді көкөніс түрін өсіріп, оны ел тұрғындары мен аудан ор­та­лығындағы аурухана және балабақша секілді әлеуметтік мекемелерге ыңғайлы әрі қол­жетімді бағамен өткізуді көздеп отыр. Сы­рым елінде жылыжай жасақ­таған кәсіп иелері бұған дейін де болған екен. Алайда, олар тиісті технологиялар мен қыс кезінде қажетті ішкі температуралық ре­жімді ұстай алмаған. Осын­дай ол­­қылықты толтырған Бейбіттің ізденімпаздығы мен еңбекқорлығы сүйсіндірмей қоймайды. Үшіншіден, Бейбіт Тахамбетов облыс пен аудан орталығы арасын­дағы жеңіл жолаушылар көлігі та­­сымалын үйлестіріп әрі реттеп отырған оператор-менеджер. Ол халқына тигізген шапағаты мен жақсылығын бұлдамайтын қа­зақ­тың бір марқасқа ұлы. Жақсы – ісі­мен жақсы дегендей, елге ти­гізетін көмегің мол бола берсін дейміз біз оған шын пейілден.  Темір ҚҰСАЙЫН, «Егемен Қазақстан». Батыс Қазақстан облысы, Сырым ауданы Суретте: жеке кәсіпкер Бейбіт Тахамбетов, жылыжайдың ішкі көрінісі.  Суретті түсірген Бауыржан ШИРМЕДЕНҰЛЫ.