Дайындық жайы айтылған басқосу

Кеше Қарағанды қаласында Жалпыұлттық социал-демократиялық партиясы баспасөз мәслихатын өткізді. Жиында партия мүшелері алдымыздағы 20 наурызда болатын кезектен тыс сайлауға деген дайындық жұмыстарын егжей-тегжейлі айтып берді. Баспасөз мәслихатына ЖСДП сайлауалды штабының төрағасы Айдар Әлібаев, «Қазақстандағы парламентаризмді дамыту қоры» қоғамдық бірлестігінің жетекшісі Зәуреш Батталова, «Семей» қозғалысының жетекшісі Болатбек Әбдікәрім, «Кенесары хан» қоғамдық бір­лес­тігінің жетекшісі Уәлихан Қайса­ров, ЖСДП Қарағанды облыстық филиа­лының төрайымы Мәкилә Тоқсамбаева және басқа да ЖСДП мүшелері қатысты. Баспасөз мәслихатында ЖСДП сай­лауалды штабының төрағасы, партия төралқасының мүшесі, Қазақ­стан Республикасы Парламенті Мәжі­лі­сінің депутаттығына кандидат Ай­дар Әлібаев Жалпыұлттық социал-демо­кра­тиялық партиясы алдағы сайлауда тұр­ғын­дардан жеткілікті көлемде дауыс алуға күш жұмсайтынын айтты. Қазіргі таңда ЖСДП сайлауға қызу дайындықты бастап кетіпті. Дайын­дық кезеңінің бірнеше сатысы артта қалған. Мәселен, Жалпыұлттық со­циал-демократиялық партиясы сайлау­алды науқанының ресми түрдегі қатысушысы атан­ған, партия атынан сайлауға түсетін үміткерлердің бәрі тіркеуден өткен. Олардың саны – 23. Сондай-ақ, қа­зіргі таңда өңірлерге партияның үгіт-наси­хат ма­териалдары, үнпарақтар мен пла­кат­тар, партияның сайлауалды бағдар­ламасы таратылған. Сонымен қатар, партия басшылығы мен кандидаттар еліміздің түкпір-түкпіріндегі сайлаушылармен кездесулер өткізуді жоспарлап отыр екен. «ЖСДП өзінің көп жыл бойы ұсынып келе жатқан аса қажетті өзгерістер жос­парын жүзеге асыруды мақсат етіп, Қазақстанды экономикалық жағынан пәр­менді, табысты, әлеуметшіл, жауап­кер­шілігі жоғары, еркін, тұрақтылығы мығым, тәуелсіздігі орнықты мемлекет ету үшін Парламент Мәжілісі сайлауына қа­тысады. Сондай-ақ, өзіміздің бүкіл тәжірибемізді халықаралық социал-демократия идеясының үздік жетістіктерін біріктіре отырып жоғарыда аталған мін­деттерді іске асыру үшін қажетті шара­лар кешенін жүзеге асыруды мақ­сат етеміз. Қа­зақстандағы және шетел­дер­дегі мен­шікті «көлеңкеден» шыға­рып, оның ие­лерінің қатаң есеп беруін бел­гі­леу қа­жет», – деп мәлімдеді баспасөз мәс­­ли­ха­тына қатысқан социал-демократтар. Баспасөз мәслихаты барысында ЖСДП мүшелері республикалық және жергілікті бұқаралық ақпарат құралдар өкілдерінің тараптарынан қойылған сұрақтарға жауап беріп, алдағы сайлау­да өздерінің белгілі бір табысқа қол жеткізетіндіктеріне сенімді екендіктерін тілге тиек етті. Қайрат ӘБІЛДИНОВ, «Егемен Қазақстан». ҚАРАҒАНДЫ.