Жаңа әуе жолы

Шымкенттік SCAT авиаком­паниясы наурыз айынан бас­тап Алматы – Шарм-эль Шейх – Алматы бағытындағы әуе қа­ты­насын ашуды жоспарлап отыр. Көне Мысыр еліне әуе кеңістігі ашылатындығы жөнінде Инвестициялар және даму министрлігінің баспасөз қызметі осылай деп хабарлады. Өз кезегінде Fly Egypt әуе компаниясы Қазақстанға наурыз айынан бастап аптасына екі рет тұрақты рейстер ұшыруды көздеуде. Қазақстанның Азаматтық авиациясы қажетті құжаттарын рәсімдегеннен кейін авиаком­панияға отыз күн аралығында рұқсат беріледі. Бүгінде екі ел арасындағы әуе кеңістігі қауіпсіздік мәселелерін шешу мақсатында Қазақстан туристік қауымдастығының қатысуымен бірлескен жұмыстар жүргізіп жатыр. Әуе кеңістігінің қауіпсіздік жүйесі Шарм-эль-Шейх ха­лық­аралық әуежайы барлық талап­тарға сай деген қорытындыға келді. Оқырманға түсінікті болу үшін артқа шегінсек, өт­кен жылдың қазан айының со­ңында Мысыр жерінде Ресей ұшағы апатқа ұшырағаннан кейін Қазақстан мен Египет ара­сында қатынайтын авиаком­паниялардың қызметі тоқтаған болатын. Бүгінде құрсаудай қысқан сең бұзылды. «Бармасаң келмесең, жат боласың», дейді халық да­налығы. Оның үстіне, араб кәсіп­керлері Қазақстанға ірі көлемде инвестиция салуда. Сондықтан Қазақстанға құшағы ашық елмен қайтадан байланыс орнатудың маңызы зор.  Бақтияр ТАЙЖАН, «Егемен Қазақстан». Оңтүстік Қазақстан облысы.