Қазақстан мен Alstom серіктестік аясын ұлғайтты

Күні кеше «Қазақстан темір жолы» ҰК» АҚ президенті Асқар Мамин Alstom компаниясының президенті Анри Пупар Лафаржмен бірге «Электровоз құрастыру зауыты» АҚ-тың жұмысымен танысты. Шара барысында тараптар серіктестік аясын әлі де ұлғайтуға келісім жасады. Ол бойынша француздың Alstom кон­церні ҚТЖ-дан 25 пайыз қосым­ша үлес алып, бірлескен кәсіп­орын­дағы жалпы үлесін 50 пайызға жет­кізді. Енді «ҚТЖ» ҰК» АҚ пен «Транс­маш­холдинг» ЖАҚ-та 25 пайыз акциядан қалды. «Қазақстан әлемдік алпауыт Alstom француз компаниясымен бірлесіп көлік­тік машина құрастыру саласына тіке­лей инвестиция және жаңа техноло­гия тарту ісін жүзеге асырды. Соның нәти­же­сінде соңғы технологияға негіз­дел­ген жаңа өндіріс орны өмірге келді», деп атап өтті А.Мамин. Alstom президенті Анри Пупар Лафардждің айтуынша, Қазақстанда инвестицияға қолайлы жағдайдың бәрі жасалған. Бұл өз кезегінде ұзақ мерзімді серіктестік орнатуға мүмкіндік береді. ЭҚЗ арқылы жаңа технологияларды меңгеру қазақстандық машина жасау саласындағы көшбасшылық рөлді атқаруға мүмкіндік жасайды. Қазақ­стандық локомотивтерді әлем нарығына экспортқа шығаруға кепілдік етеді. Зауыттағы қазақстандық үлесті көбейту 2020 жылға қарай 70 пайызды құрайтын болады екен. Еліміздің бас теміржолшысының сөзіне қарағанда, қазіргі таңда Қазақ­станның теміржолдарында сағатына 120 шақырым жылдамдықпен жүретін әлемдегі ең қуатты болып саналатын KZ-8А сериясындағы 31 жүк локо­мотиві жүйткіп жүр. Сондай-ақ, саға­тына 200 шақырым жылдамдықпен жүре­тін алты дана KZ-4АТ жолаушылар локо­мотивтері халыққа қызмет көрсетуде. Бұлармен бірге, Alstom және ЭҚЗ зауыт­тың өндірістік базасында электро­возға арналған тартым трансформаторларын өндіру жөніндегі келісімге қол қойды. Осының арқа­сында зауыт Alstom концерніне аталған трансформаторларды шетелден жеткізетін ірі кәсіпорынға айналатын болады. ЭҚЗ-да трансформаторлар шығару 2016 жылдың бірінші жартыжылдығында басталып, 100-ден астам жұмыс орны құрылады деп күтілуде. Жоспарланған өндірістік қуаттылығы жылына 200-ге дейін трансформаторды құрамақ. Осы келісімдерді жасасудың арқа­сында Alstom ЭҚЗ зауытын дамытуға бүкіл күшін шоғырландырып, экс­порт­­тық әлеу­етке ие әлемдік сапа­­да­­ғы жергілікті өнімді жасап шыға­ра­­тын болады. Осылайша ЭҚЗ Қазақ­­стан эко­номикасының негізгі қоз­ғал­т­­қыш күшіне айналып, локомо­тив­терді өндіріп, оларды Еуразиялық эко­номикалық одақ және ТМД аума­ғын­дағы Әзербайжан мен Өзбекстан секіл­ді көршілес елдерден бастап, бүкіл әлем­ге экспорттайтын халықаралық өндіріс ретінде танылмақ. – ЭҚЗ зауытындағы үлесті ұлғайту және жаңа өндірісті бастау Alstom концернінің Қазақстанда бірізділікпен жүзеге асырып жатқан стратегия­сы аясындағы заңды қадам болып та­бы­лады. Біздің мақсатымыз – Қазақ­стан Республикасымен сенімді әрі ұзақ мерзімді серіктестік құру. Техно­логия­лар мен өндірісті жергіліктендіру, жаңа жұмыс орындарын құру және жергілікті мамандарды оқыту арқылы Alstom Қазақстандағы машина жасау­шы басты кәсіпорындардың бірін жаңа деңгейге көтеріп, оның алдында әлемдік нарықтың есігін ашпақ. Біз қазірдің өзінде ел аумағында 400-ден аса жұмыс орнын құрып үлгердік, өндірісті жергіліктендірудің үлесі 28 пайызға жетіп отыр және де таяудағы 2 жыл ішінде ол 50 пайызға дейін артпақ. Қазақстан Үкіметінің инвестициялауға және дамытуға арнап жасап берген қолайлы жағдайлары аясында біздің ынтымақтастығымыз барлық мүдделі тараптарға өз пайдасын әкелетініне мен нық сенімдімін, деді Alstom концернінің Ресей және ТМД аймағындағы аға вице-президенті Мартин Вожур. Салтанатты шарадан кейін кәсіп­орынның коммерциялық директоры Алексей Ершов журналистерге зауыт ішін аралатты. Ол әр цехтың атқа­ратын жұмыстарымен таныстырып, электровоздардың бұрынғылардан артықшылықтарына тоқталды. «Көріп ­отырған KZ8A жүк электровозы әлем­дегі ең қуатты әрі тиімді машина болып саналады. Мұның бұрынғылардан артықшылығы тек қуатында ғана емес, әр тұста үнемдеуге негізделіп жасал­ған электровоз бұған дейінгі темір­жол машиналарынан электр қуа­тын 25 пайызға дейін аз жұмсайды. Сондай-ақ, жылдамдығы да жоғары. Маши­нистерге қолайлы болуы үшін каби­налар үздік үлгіде жасалған. Онда тоңа­зытқыштан бастап микротолқынды пеш және шай қайнатып ішетін электр шайнекке дейін бар», деді А.Ершов. Оның сөзіне қарағанда, қазақстан­дық электровоздарды алуға қазірдің өзінде Әзербайжан елі тапсырыс бе­ріп қойған. Мұнымен бірге, таяуда ғана украин теміржолының басшыларымен Еуропа елінде кездескендерін айтты. Бүгінде электровоз парктерінің тозығы 90 пайызға таяған украин теміржолшылары да қазақстандық электровозға қатты қызығушылық таны­тып отырған көрінеді. «Украиналық әріптестеріміздің біздің электровозға тапсырыс беретініне күмәніміз жоқ. Себебі, Еуразия кеңістігінде ең тиімді деп саналатын осы зауыт бізде ғана бар. Оған қоса, біздің зауыт олардың талабын орындап, сапа бойынша қалауын қанағаттандыруға толық қабілетті», деді коммерциялық директор. Зауыттың жұмысымен таныс­қан жур­налистерді экспортқа шыға­рылатын электровоздардың бағасы да қызықтырды. «Жүк электровоздарының бағасы 6 мың еуро болады. Келешекте отандық өнімнің үлесі артып, 70 пайызға жуықтағанда бәлкім баға шамалы арзандауы да ықтимал. Негізі нақты тапсырыстар келіп тұрса, зауыт бір аптада бір электровоз құрастырып шығаруға қабілетті. Бұған қоса, алдағы уақытта қазақстандық үлес 50 пайыздан артқан кезде құрастырылған электровоздарға «Қазақстанда жасалған» деген логотиптер жапсырылатын болады. Бұйыртса, бұл мақсатқа 2020 жылы қол жеткіземіз деген үмітіміз бар», деді ол. Нұрбай ЕЛМҰРАТОВ, «Егемен Қазақстан».