Отандық өнімге – ұдайы артықшылық

Кеше Қазақстан Коммунистік халық партиясының (ҚКХП) өкілдері республикалық сайлауалды штабы үгіт-насихат науқаны аясында Тараздағы «Та-Мак» ЖШС жұмыскерлерімен кездесу ұйымдастырды. Жұмысшы табы өкілдері коммунистік идеяны жақтайтындығын алдымен ауызға алған ҚКХП атынан үміткерлер тізіміне енген, V шақырылымның депутаты Жамбыл Ахметбеков жиналғандар алдында сөйлеп, қазақстандық төл өнімнің маңыздылығын, оның сапасы жақсарған сайын сұранысқа ие болып келе жатқанын атап өтті. Сонымен қатар, шешен коммунистік идеяның халықтың әл-қуатын арттыруды көздейтінін, қоғамда әділеттілік пен келісімнің болуын жақтайтынын айтты. Ұлттық экономиканың үдемелі өсімі елдегі тұрақтылықтың негізі болады, деді шешен. V сайланымда коммунистік партия атынан депутаттыққа өткендер ұлттық экономиканың өсімімен қатар, халықтың мұң-мұқтажын қорғауда белсенділік көрсеткенінен нақты мысалдар келтірді. Соның ішінде депутаттар Қоңыров, Өмірзақов және т.б. кейбір банктердің халықты алдау бағытында жүргізген саясатын әшкерелеп, Үкімет басшысына сауалдар жолдағанын, оларды фракциядағы барлық депутаттар қолдағанын жеткізді. Ж.Ахметбековтің пікірінше, отан­­­дық өнімдер шығарып жүрген кәсіп­­орындар өкімет тарапынан үлкен қол­­дауға ие болуы керек. «Соның ішін­де сіз­дердің кәсіп­орындарыңыз да бар. Егер ҚКХП өкілдері 7 пайыздық табал­дырық­ты ең­серіп, тағы да депутаттар қатар­ына өтетін болса, біз қолдан келген кө­ме­гімізді жасап, Үкімет назарын осындай мәселеге үнемі аударып отыра­тын боламыз», – деді ол. Сөзінің соңында Жамбыл Ахметбеков отандық өндірісті дамыту мен қолдау жаңа жұмыс орындарының ашылуына да түрткі болатынын айтты. Сондықтан осы сала үнемі алдыңғы кезектегі назарда болуы керек. Осылай дей келе, ол кәсіпорын қызметкерлерін ҚКХП-ға дауыс беруге шақырды. ҚКХП Жамбыл облыстық коми­те­тінің жетекшісі Жарылқасын Нұрәлиев дұрыс тамақтануға негіз болатын өнім өн­діріп отырған кәсіпорын саламатты ұр­пақ қалыптастыруға қомақты үлес қо­са­­тынын жеткізді. «Бізді елімізде осын­­дай кәсіпорындардың көбейіп келе жат­қандығы қуантады», – деді Ж.Нұрәлиев. Жиын соңында ҚКХП-ның белсен­ділері «Та-Мак» ЖШС жұмыскер­лерін өздерінің жиынына келіп, бағдар­ламалары мен пікірлерін тыңдағандары үшін алғыстарын айтты және Парламент Мәжілісінің сайлауында өздеріне дауыс беруге шақырды. Жақсыбай САМРАТ, «Егемен Қазақстан». Жамбыл облысы.