Атырауда көлікпен адам басқан азамат қамауға алынды

АТЫРАУ. 29 ақпан. Атырау қалалық №2 соты саунаны пайдаланғаны үшін қызмет ақысын төлемей бүлік шығарып, кейін мас күйінде автокөлікпен адамды басқан азаматты қамауға алды. Бұл туралы облыстық соттың баспасөз қызметі хабарлады. «Тергеу дерегіне сәйкес, бүлік шығарушы өзінің туысымен бірге Атырау қаласындағы сауналардың біріне келген. Шығар кезде ол саунаның қызметі үшін ақы төлеуден бас тартады. Қызметкерлердің сөздеріне құлақ аспай, ашуланып, балағаттайды. Ақша төлеудің орнына мас жүргізуші өз көлігіне отырып, артқа шегінген кезде өз туысын басып кеткен. Содан соң, ашуға ерік берген «қонақ» сауна қызметкерлерін көлікпен қуады. Шатақ шығарушы олардың бірін қағып, оны көлікпен 10-15 метр жерге сүйрейді. Бірнеше рет жәбірленушінің үстінен тапап өткен. Артынша оқиға болған жерден бой тасалайды. Нәтижесінде жәбірленуші алған ауыр дене жарақаттарының әсерінен ауруханада көз жұмған», – деп хабарлады Атырау сотының баспасөз хатшысы Боранбай Ғалиев. Баспасөз мәлімдемесінде айтылғандай, қазіргі уақытта бүлік шығарушыға қатысты Қылмыстық кодекстің 106-бабының 3-бөлімімен қылмыстық іс қозғалып, сотпен екі ай мерзімге «күзетпен ұстау» түріндегі бұлтарпау шарасына санкция берілді. Қазіргі таңда тергеу амалдары жалғасуда. Жолдасбек Шөпеғұл. Дерек: Атырау облыстық сотының баспасөз қызметі. Сурет: aif.ru.