Келелі мәселелер қозғалған кездесу

«Бірлік» партиясының мүшелері мен партияның жастар қанаты Астанадағы Республикалық ғылыми-техникалық кітапханада технология және бизнес колледжінің студенттерімен кездесті. Кітапхана ісінің бүгінгі жағдайы мен даму перспективасы және кітап қорының үнемі жаңарып отыруы төңі­регіндегі пікір алмасулар «Бірлік» партиясы шарасының негізгі арқауы болды. Бас­па өнімдеріне деген оқырманның қызы­ғушылығын оятуға бағытталған акциялар мен түрлі шараларды ұйымдастыра оты­рып, қоғам өміріндегі кітаптың рөлін нығайтудың маңызы жөніндегі ойлар ортаға салынды. Партия өкілдері кітаптың тұлғаны қалыптастырудағы орны туралы өз тәжі­рибелерімен бөлісу мақсатында бүгін­гі акцияға жеке кітапханаларынан өздері­нің бірнеше сүйікті кітаптарын ала келіпті. Сонымен қатар, кітап оқуды кең наси­хаттауға арналған ұсыныстарын да жария қылды. «Бірлік» партиясы төрағасының орын­басары Болат Байқадамов пен партия мүшесі Мұрат Раевтың пікірінше, қандай керемет дамыған заман болса да адамзат мәдениетінде кітаптың маңызы еш кемімейді. Кітап оқу рухани-мәдени кемелдікке жеткізетіндіктен, қазіргі жастар өмірінің ажырамас бөлігіне айналуы тиіс. Кездесу соңында «Бірлік» партиясының жастар қанаты кітап­хана­ның алдында «Кітап – білім бұлағы», «Брось мышку – возьми книжку» атты флеш-моб өткізді. Олар оқырмандар мен қала тұрғындарын партияның осы бастамасын қолдауға шақыратын үнпарақтар таратты. «Бірлік» партиясының атынан Пар­ламент Мәжілісіне үміткерлердің пікірін­ше, азаматтардың кітап оқу мәде­ниетін көтеру партия жұмысының бір бағыты болуы тиіс. Сондықтан, олар болашақта осы тақырыпты кеңірек қау­зау үшін тағы да бірнеше іс-шара ұйымдастыруды көздеп отыр екен. Ал жексенбі күні «Бірлік» пар­тия­сы­ның өкілдері Астанадағы қарттар мен мүгедектер үйінің ұжымымен кездес­ті. Аталған партиядан Парламент Мәжілі­сіне ұсынылған кандидаттар осы кездесу барысында өздерінің сайлауалды бағдарламаларымен таныстырып, ұлттық дәстүрлер мен адами құндылықтарға байланысты аға ұрпақтың ойындағы көптеген түйткілдерді қозғады. Қилы тағдырдың тәлкегімен қарттар үйіне күні қараған қариялардың өмірге деген құлшынысы ерекше. Өкініштісі, мемлекет тарапынан оларға барлық жағдай жасалғанымен, ағайын-туыстары мен жақын-жұрағаттарының ілтипаты мен құрметіне зәру. Сондықтан, «Бірлік» партиясының қоғамдағы мәдени-рухани құндылықтарды түлетіп, әр қоғам мүшесіне ізгі ниет білдіріп, жан жы­лулығын сыйлауды насихаттауы қарт­тардың көңіл-күйін ерекше көтерді. Ләйла ЕДІЛҚЫЗЫ, «Егемен Қазақстан». Астана.