Маңызы зор шара

Ел Тәуелсіздігінің мерейтойына орай ұйымдастырылған «Мәңгілік Ел» әлеуметтік пойызына мінген қадірлі қонақтарға Аққайың ауданының жұртшылығы гүл шоқтарын ұсынып, көтеріңкі көңіл-күймен қарсы алды. Теміржол вокзалында этномәдени бірлестіктер, үкіметтік емес ұйымдар, жастар өкілдерінің қатысуымен өткен митингіні аудан әкімі Дәурен Байтөлешов ашып, «Мәңгілік Ел» әлеуметтік пойызы аясында Тәуелсіздігіміздің қол жетпес құндылықтарын насихаттап, медициналық, құқықтық, тағы басқа қызметтер көрсетуді басты мақсат еткен акцияға қатысушыларды қасиетті Қызылжар жеріне келулерімен құттықтап, жұмыстарына табыс тіледі. Айтулы шараға қатысу­шы­ларды бастап келген топ же­текшісі Әміржан Әлпейісов өзге ай­мақтар секілді жүзден астам ұлт өкілдері мекендейтін Солтүстік Қазақстан облысы тұрғындарының құшақ жая қарсы алғандары үшін ризашылығын білдіріп, акцияның өскелең ұрпақ үшін мән-маңызын атап көрсетті. Ол өз сөзінде Қа­зақстан ширек ғасырға жуық уа­қыт бедерінде азат елге айналып қана қоймай, экономикалық даму тұрғысынан да алда келе жатқанын, үлгі алар тағылымдар мен үрдістер мол екенін жеткізді. Салтанатты шарадан соң Ден­­­саулық сақтау және әлеу­меттік даму, Білім және ғылым министрліктерінің, «Ата­мекен» ұлттық кәсіпкерлер пала­тасы­ның өкілдері аудандық кі­тап­хана мен халыққа қызмет көр­сету орталығында кездесу­лер ұйым­дастырып, қоғамдық қа­былдау жүргізді. Өтініш-тілектер айта келген көпшіліктің арыздарын мұқият тыңдап, ше­шілуіне ықпал жасады. «Ата­мекен» ұлттық кәсіпкерлер депар­таментінің сарапшысы Арнұр Дәрібаев, «Қаз­агроөнім» АҚ ап­парат бас­шы­­сының атқарушы директоры Мұрат Ергешбаев құқықтық жағынан түсініктемелер берсе, дәрігерлер орталықтандырылған емханада келушілерді қабылдап, медициналық көмек көрсетті. Осы күні ақ халатты абзал жан­дарға алты жүзге жуық адам тегін тексерулерден өтті. Олардың қа­та­рында Ғалия Сүйіндікова, Ыбырай Құсайынов секілді тұр­ғындар болып, ақ алғыстарын жаудырды. «Жұмыспен қамтудың жол картасы-2020» бағдарламасына қатысушылардың бірі Владимир Ковалев ауылдық жерде кәсібін өркендетуге мүмкіндік беріп отыр­ған жобаларға қуанышты екенін білдірді. Түстен кейін «Мәңгілік Ел» әлеуметтік акциясы шеңберін­де Пре­зидент жанындағы «Қо­ғам­дық келісім» республикалық мем­лекеттік мекеменің қыз­мет­кер­лері мен этномәдени бірлестіктердің мүшелері брифинг ұйымдастырып, Жолдау талаптарын, «100 нақты қадам» Ұлт Жоспары мақсаттарын түсіндіріп, «Мәңгілік Ел» идеясы басты тақырып арқауына айналды. Жастардың бас болуымен өткен флеш-мобта, «Менің елім–Мәңгілік Ел» кітап көрмесінде жұртшылық Тәуелсіздік құнды­лықтарын жан-жақты сипаттайтын дүниелермен танысты. Облыс көркемөнерпаздарының кон­церттік бағдарламасын тамашалады. Өмір ЕСҚАЛИ, «Егемен Қазақстан». Солтүстік Қазақстан облысы. Суреттерді түсірген Талғат ТӘНІБАЕВ.