Байқаушыларды аккредиттеу барысымен таныстырды

Кеше Орталық сайлау комиссиясының мүшесі Марат Сәрсембаев 2016 жылғы 20 наурызға тағайындалған Қазақстан Республикасы Парламенті Мәжілісінің және мәслихаттарының депутаттарын сайлауда шет мемлекеттер мен халықаралық ұйымдардан байқаушыларды аккредиттеу барысы туралы брифинг өткізді. Брифингте ОСК мүшесі сайлауды халықаралық байқау бүкіл әлемге кеңінен танымал болғанын және сайлау үдерістерінің сипатын дәл және алаламай баға­лауды қамтамасыз етуде маңызды рөл атқаратынын атап өтті. «Бай­қаушылар халықаралық қоғам­дас­тықтың адам құқықтарын құрмет­теу мен құқық үстемдігін дамы­тудың компоненті ретінде демо­кратиялық сайлау өткізуді қамта­масыз етуге деген қызығушылық білдіруі болып табылады, – деді ол. – Халықаралық байқаушылардың болуы сайлау үдерістерінің беделін арттырады және көбіне олардың жариялылығы мен ашықтығының кепілі саналады». Біздің елімізде болатын алдағы сайлауды байқауға ЕҚЫҰ-ның Демократиялық институттар мен адам құқықтары жөніндегі бюросы, ЕҚЫҰ-ның Парламенттік Ас­самблеясы, Еуропа Кеңесінің Пар­ламенттік Ассамблеясы, Тәуелсіз Мемлекеттер Достастығы, Шан­хай ынтымақтастығы ұйымы, Ислам ынтымақтастығы ұйымы, Түркітілдес мемлекеттердің ынты­мақ­тастық кеңесі, Түркітілдес елдер­дің Парламенттік Ассам­блеясы секілді беделді ұйым­дар­дың, сондай-ақ, он тоғыз шет мемлекеттің орталық сайлау ор­гандарының өкілдері шақырылған. Ал 1 наурыздағы жағдай бойынша Қазақстан Республикасы Орталық сайлау комиссиясы Сырт­қы істер министрлігінің ұсы­нуы бойынша халықаралық ұйым­дар мен шет мемлекеттердің 175 байқаушысын аккредиттеді. Олар­дың ішінде ЕҚЫҰ/ДИАҚБ-ның 44 байқаушысы, ТМД миссиясының 111 байқаушысы, Ислам ынты­мақтастығы ұйы­мының үш және сегіз шет мем­лекеттің 17 бай­қаушысы бар. Бұдан басқа Сырт­қы істер ми­нистрлігі 26 мемлекет­тен 112 шетелдік БАҚ өкілін ак­кредит­теді. Осылайша, қазіргі уа­қытта барлығы 45 елден 287 ха­лық­аралық байқаушы мен шетелдік бұқаралық ақпарат құралдарының өкілі аккредиттелді. Еліміздің сайлау заңнамасына сәйкес халықаралық байқаушылар мен Сыртқы істер министрлігі аккредиттеген журналистердің сайлау үдерісінің барлық кезеңдеріне қатысуға, сайлау науқанының барысы туралы ақпарат алуға, дауыс беру мен дауыстарды санауды жүргізу уақытында сайлау учаскелеріне баруға, сайлау үдерісіне қатысушылармен кездесуге, сайлау комиссияларының мүшелеріне өз байқаулары, анық­талған бұзушылықтар жөнінде хабарлауға, ұсынымдар енгізуге, жария өтініштер жасауға құқығы бар. Брифинг соңында М.Сәр­сем­баев: «Ұзақ мерзімді және қысқа мерзімді халықаралық байқау­шы­лардың болуы сайлау­ды ұйым­дастырушылардың, кандидаттар мен саяси партиялардың, азаматтық қоғам мен сайлау үдерісіне басқа да қатысушылардың жауапкершілігін арттыра түседі. Сонымен қатар, отандық байқаушылардың, сая­си партиялар мен қоғамдық бір­лестіктердің, бұқаралық ақпарат құралдары өкілдерінің, сондай-ақ, халықаралық сарапшылар мен байқаушылардың бірлескен жұмысы мен өзара тиімді іс-қимылы сайлау үдерісін барынша әділ, транспарентті әрі ашық етуге мүмкіндік береді», – деді. Әлисұлтан ҚҰЛАНБАЙ, «Егемен Қазақстан».