Учаскелердің жұмысы пысықталды

Сайлау мерзімі жақындаған сайын өңірлердегі оны өткізуге жауапты орындар – сайлау учаскелерінде жұмыс қыза түсті. Сайлау комиссиясының мүшелері өздеріне жүктелген міндеттерді лайықты атқарып шығу үшін тыңғылықты дайындалуда. Парламент Мәжілісінің депутаттарын жаңадан сайлау үшін Маңғыстау облысында 199 сайлау учаскесі құрылған. Олар қа­зіргі таңда сайлау барысына қажетті жұмыстарды рет-ретімен еңсеріп, дайындық жұмыстарын жүргізуде. Бұл туралы Маңғыстау облыстық сайлау комиссиясының өңірдегі сайлау учаскелерінің жұмысты бастауына арналған кезекті отырысында толыққанды айтылды. 28 ақпан күні барлық әкімдік­терден сайлаушылардың тізімін алу аяқталып, қазір сайлау комиссиялары тізімді нақтылау үстінде. Тізімге енбей қалған немесе мекенжайы туралы мәліметінен қателік кеткендер болса, анықтап алу жұмыстары жүруде. 4 нау­рыз күні тізімдер барлық сайлау учаскелерінде арнайы үстелдерге қойылады немесе қабырғаларға ілінеді. Бұл әрбір сайлаушының өзінің тізімде бар-жоғын алдын ала анықтауына мүмкіндік береді. Сондай-ақ, сайлаудан он күн бұрын, яғни 10 наурызда үйді-үйге сайлаушылар үшін жеке шақыртулар таратылады. Маңғыстау облысындағы техникалық жабдықтармен жа­рақтандырылып, әдістемелік нұсқаулықтармен қамтылған сайлау учаскелері өз жұмыстарын толық бастады. Комиссия мү­ше­лері – кім бюллетень береді, кім байқаушыларды және сайлаушыларды қарсы алып, орналастырумен айналысады, сұ­рақтар туындаған азаматтарға көмек беру кімге жүктеледі немесе өзге де міндеттерді бөлісіп, пысықтауда. – Негізінен облысымыздың сайлау учаскелеріндегі комиссия мүшелерінің атқаратын қызметіне қатысты жұмыстар аяқталды деу­ге болады. Біраз учаскелерде арнайы сайлау кабиналары құ­ры­лып, урналар да қойылды. Ғаламтор желісі, факс және телефон мәселелері шешіліп, орнатылды. Қаладағы қай шағын ауданның қай үйі қай үстелден сайлау бюллетенін алады деген мәселе шешілуде. Сондай-ақ, сайлау комиссиясының мүшелері Халыққа қызмет көрсету орта­лығымен бірлесіп, сайлау ке­зінде сайлаушылар тізімінен өзінің аты-жөнін таба алмаған сайлаушының уақытын алып, қандай да бір келеңсіздіктерге жолықпасы үшін мәселені дереу шешу жолын қарастырды. Ол – сайлау кезінде Халыққа қызмет көрсету орталығы қызметкерлері келіп отырып, тізімі жоқ адам­ның мекенжайын анықтап, арнайы мекенжай анықтамасын беру мүмкіндігі қарастырылған, – дейді Маңғыстау облысы бойынша сайлау комиссиясының төрағасы Есен Күмісқали. Отырыста сайлау бюллетені мәселесі де назардан тыс қалған жоқ. Өңірдегі 356 мыңнан астам сайлаушы үшін бюллетень дайындау жұмыстары өз ырғағымен жүруде. Сондай-ақ, сайлау ке­зінде сайлау учаскелерінде байланыс, ғаламтор, жарық мә­селесінен түйткіл туындамауы үшін тиісті орындармен ке­лісімдер жасалған. Маңғыстау облысы бойынша сайлау комиссиясының төрағасы Е. Күмісқали облыстың сайлау учаскелеріндегі аяқталған және бүгінгі жүргізіліп жатқан жұмыстармен, сондай-ақ, жос­парланған жұмыстармен жан-жақты таныстырып, мәжі­ліс­­­мендерді таңдауға маң­ғыс­тау­лық сайлаушылардың ұйым­шылдықпен қатысатынына сенім білдірді. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.