Мониторинг жүргізуге барлық жағдай жасалған

Кеше Орталық сайлау комиссиясында ТМД бай­қау­шылары миссиясының жетекшісі Евгений Слобода бас­пасөз мәслихатын өткізіп, онда ол Парламент Мәжілісі де­путаттарының кезектен тыс сайлауына шетелдік бай­қаушылар мониторинг жүргізу үшін барлық жағдай жасалғанын мәлімдеді. «Тәуелсіз Мемлекеттер Достастығының байқаушылар миссиясына ҚР Парламенті Мәжілісі депутаттарының кезектен тыс сайлауына мониторинг жүргізуі үшін барлық қажетті жағдай жасалған. Ал бұл сайлау үдерісінің ашық әрі әділ жүргізіліп жатқандығын дәлелдейді», – деді ол осы жө­нінде. Миссия басшысының атап өтуінше, бүгінгі күнге дейін Достастықтан 111 байқаушы ҚР Орталық сайлау комиссиясынан аккредиттеуден өткен. Тағы 130 байқаушының құжаттарын комиссия қарау үстінде екен. «Қазірдің өзінде миссия құрамында 240-тан астам бай­қау­шының болатындығын нық сенім­­мен айтуға болады. Мұнан бөлек, миссия құрамына ТМД-ға қаты­сушы мемлекеттер­дің Парламент­аралық Ассамблея­сының, Бе­ларусь пен Ресей одағы парла­менттік жиналысының, ҰҚШҰ Парламенттік Ассам­блея­сының, ТМД Атқарушы комите­тінің өкілдері де кіреді», – деді Е.Слобода. Сонымен бірге, ол ҚР Орта­лық сайлау комиссиясы алдағы сайлауға дайындық жұмыстарын тыңғылықты жүргізіп жатқан­ды­ғына тоқталды. «Орталық сайлау комиссиясы алдағы сайлау науқанына дайындық жұмыстарын тұрақты әрі рет-ретімен жүргізіп жатқанын атап өткім келеді. Әдістемелік қамтамасыз ету де тыңғылықты жүргізіліп, кадрлар да жақсы жасақталған, – деді Е.Слобода. – Бұған қоса, Орталық сай­лау комиссиясы сайлау үдерісін ұйым­дастырушыларға, БАҚ өкілдеріне, саяси партияларға арнайы оқыту семинарларын өткізді. Аталған семинарларда ОСК мүшелері, құқық қорғау органдарының, оның ішінде прокуратураның, соттардың өкілдері сөз сөйлеп, сайлау заңнамасын қолдану жолдарын жан-жақты түсіндіріп берді». Миссия басшысы өздері болған сайлау комиссиясында барлық жұмыстардың жоғары деңгейде ұйымдастырылғанына куә болғандықтарын да атап өтті. Әлисұлтан ҚҰЛАНБАЙ, «Егемен Қазақстан».