Facebook компаниясы MSQRD қосымшасын сатып алды

АСТАНА. 9 наурыз. Facebook компаниясы адам бейнесіне түрлі кейіптегі маска қоятын MSQRD қосымшасын сатып алды. Бұл туралы РИА «Новости» ақпарат агенттігіне сілтеме жасаған egemen.kz тілшісі хабарлады. «Ендігі кезекте біз өз технологиямызды Facebook желісін пайдаланатын 1,6 миллиард адамға ұсына аламыз. Аудиториямыз осындай дәрежеге дейін ұлғаяды деп ойламаған едік», – дейді MSQRD басшылығы. Алдын ала болжам бойынша, бұл қосымша әзірге жеке сервис болып қала береді. Құрастырушылары Евгений Невгень, Сергей Гончар және Евгений Затепякин Ұлыбританиядағы Facebook компаниясының кеңсесіне көшеді. Ал келісімшарт сомасы әзірге белгісіз. MSQRD қосымшасы өткен жылдың желтоқсан айында пайда болды. Ал биыл ақпан айының соңына таман тұтынушылар саны 10 миллион адамға жеткені анықталды. Әлемнің 60-тан астам елінде сұранысы жоғары қосымшалардың арасында бірінші орынды иеленіп тұр. Аян Әбдуәли. Дерек: РИА «Новости». Сурет: euroradio.fm.