Грантқа ие болды

Өскемен қаласындағы Назарбаев зият­керлік мектебі­­нің түлегі Оңтүстік Кореяның беделді оқу орындарының бірінің грантын жеңіп алды. Сеул Ұлттық университетінде білім алуға ресми түрде шақырту алған Аяужан Ахмадиева корей елінде «Бизнесті басқару» мамандығын меңгермек. – Бұл мен үшін қуанышты жа­ңалық болды. Өйткені, Кореяда оқуды мектеп қабырғасында-ақ армандаған едім. Бұл да ел еге­мен­дігінің ар­қасы, – дейді ол. Корея Республикасы Үкіметінің арнайы грант байқауына қатысқан Аяужан бір орынға 25 адамнан ке­ле­тін алғашқы турда өзін таныс­тырып, мінездеме хат пен марапаттамаларын ұсынса, келесі кезеңде комиссия мүшелерінің үміткермен сұхбат жүргізгенін айтады. Ал ше­шуші кезеңде ко­рея­лық жоғары оқу орны тара­пынан талапкердің барлық құжаттары қарастырылды. Өске­мендік бойжеткен өткен жы­лы химия-биология бағытындағы Назарбаев зияткерлік мектебін «Алтын белгімен» тәмамдаған бо­латын. Шетелде білім алуға ұсы­ныс түскенге дейін Астанадағы Назарбаев Университетте білім алды. Сеул қаласындағы оқуына 1 наурыздан бастап кірісетін Аяу­жанның айтуынша, шақырушы тарап қазақстандық студентті те­гін оқумен қатар, баспана және шәкіртақымен қамтамасыз етпек. Сондай-ақ, Қазақстан мен Оң­түс­тік Корея арасындағы ұшақтың жол­ақы құнын да өтейді. Аталған білім ордасы ағылшын тілінде оқытады. Ал Аяужанның шет тілін меңгеру деңгейін халық­аралық IELTS емтиханын 6,5 балға тапсырғанынан көруге болады. Оқу ережесі бойынша студент алғашқы жылды корей тілін меңгеруге ар­найды. Алматы қаласындағы жұ­мыс сапары аясында Елбасы Нұрсұлтан Назарбаев әлемдегі үйренуге тұ­рар­лық тілдердің бірі корей тілі екенін атап айтқан еді. Сеул ұлттық университеті Кореяның ең ірі жоғары оқу орны және әлемнің 50 іргелі жоғары оқу орындарының санатына енген. Думан АНАШ, «Егемен Қазақстан». ӨСКЕМЕН.