Елбасы Нұрсұлтан Назарбаев Ақтөбе өңіріне келген жұмыс сапарының екінші күні еліміздегі кешенді мұнай кәсіпшілігі қондырғыларын шығаруға мамандандырылған ірі кәсіпорын – «Ақтөбе мұнай қондырғылары зауыты» АҚ-та болды. Бұл зауыт елімізде сорғы штангаларын шығаратын бірден-бір ірі кәсіпорын болып табылады, еліміздің мұнай қондырғыларына деген сұранысының 86 пайызын қамтамасыз етеді және Өзбекстан мұнай компанияларына жабдықтар жеткізеді. Кәсіпорын өз өнімдерін экспортқа шығару жолдарын да қарастыруда.
Дағдарыстан – дамуға!
Елбасы, сондай-ақ, осы арада үлгілері қойылған «Каспий плюс» «Ақтөбе рельс арқалығы зауыты», «Светоком», «Евразметалл» жауапкершілігі шектеулі серіктестіктері өнімдерімен танысты. Бұл кәсіпорындар дағдарыс жағдайында да дамуды қамтамасыз етіп отырған өндіріс орындары болып табылады.
Аймақ басшысы өңірдің әлеуметтік-экономикалық жағдайы туралы баяндай келіп, өңірдегі атқарылып жатқан жұмыстар мен игілікті ізденістерге тоқталып өтті. Облыста жұмыссыздық деңгейі өскен жоқ. Әлеуметтік маңызға ие азық-түлік бағалары, еңбек қатынастарына қатысты мәселелер бақылауда ұсталуда, оларды оң шешудің сәтті қадамдары қалыптасуда, – деп мәлімдеді Бердібек Мәшбекұлы.
Аймақ басшысының айтуынша, өткен жылы облыстағы салық салынатын база 1,4 миллиард теңгеге артқан. Үстіміздегі жылы тағы да қосымша 2 миллиард теңге табу көзделуде. Бұған қоса, биыл 2,3 миллиард теңге оңтайландырылады. Соның ішінде барлық әлеуметтік нысандар газбен жылытуға, мемлекеттік мекемелер автокөліктері сығымдалған газға көшіріледі. Бұл жылына 0,5 миллиард теңге үнемдеуге мүмкіндік береді. Ірі компаниялардың әлеуметтік жауапкершілігін арттыру бойынша белсенді жұмыс жасалып жатыр. Мысалы, өткен жылы табиғат пайдаланушылар облыстың әлеуметтік-экономикалық дамуына 3,1 миллиард теңге бөлген. Үстіміздегі жылы бұл көлем 4,4 миллиард теңге болады деп болжануда.
Өңірде мемлекет және жекеменшік әріптестігі аясында 29 жобаны жүзеге асыру бойынша жұмыстар атқарылуда. Олардың қатарында медициналық жедел жәрдем бекетінің құрылысы, қалалық стоматологиялық емхана, офтальмологиялық аурухана, оқушылар сарайы, 10 балабақша, 3 емхана, 1 аурухана және басқа нысандарды атауға болады. Бердібек Сапарбаев Елбасына өңірде мемлекеттік үдемелі индустриялық-инновациялық мемлекеттік бағдарламаны жүзеге асыру барысында құны 49 миллиард теңге тұратын 10 инвестициялық жоба жүзеге асырылатынын және 700-ге жуық жұмыс орны ашылатынын хабардар етті. Шетелдік инвесторлар қатты тұрмыстық қалдық өңдеу, бензол, никель-кобальт концентраты өндірісін, цемент зауытының және басқа құрылыстарды салуды көздеуде. Облыста импорт алмастыру бойынша инвесторлар анықталды. Өңірде шағын және орта кәсіпкерлікті дамыту бойынша белсенді жұмыстар жүргізілуде. Биылдың өзінде кәсіпкерлікті шағын несиелеуге 4,5 миллиард теңге бөлінді. Бұл – өткен жылғы көлемнен 3,6 миллиард теңгеге артық.
Елбасы Нұрсұлтан Назарбаев дағдарыс жағдайында да өңірдің экономикалық-әлеуметтік дамуын, тұрақтылық пен татулықты қамтамасыз етіп, ілгерілетуге бағытталған ізденістерге ұйытқы болып отырған аймақ басшысының жұмысына оң баға берді «Ақтөбе мұнай қондырғылары» зауыты шығаратын өнім үлгілерімен және өндірістің технологиялық үдерістерімен танысқаннан кейін Елбасы кәсіпорын жұмысшыларымен, аймақтың шағын және орта бизнес өкілдерімен кездесті. Президент елімізді индустрияландыру есебінен жұмысшы мамандықтарының маңызы артып отырғанын айрықша атап өтті. Нұрсұлтан Әбішұлы аймақтағы кәсіпорындарда жұмыс орындарын сақтаудың және инновацияны енгізудің маңыздылығына баса назар аударды.
Бақыттың кілті – еңбекте
Кәсіпорын жұмысшыларымен және шағын және орта бизнес өкілдерімен емен-жарқын әңгімелескен Елбасы қазіргі таңда бақыттың кілті еңбекте екенін қадап айтты. Адал еңбек ету арқылы өз бақытыңды табуға болатынын әңгіме өзегіне айналдырды. Осы зауыттың операторы Жүсіп Әбдікималов Президенттің бастамасымен жүзеге асырылып жатқан «Нұрлы Жол» мемлекеттік бағдарламасының өміршеңдігін, сол арқылы Астана мен өңірлердің қатынасы дамып отырғанын, өзі туып-өскен Шалқар ауданының үстімен Астанадан қатты жамылғылы жол салынатыны жол бойындағы елді мекендердің дамуына алғышарт жасайтынын айтып өтті.
«Сымбат» ЖШС директоры Рабиға Тасыбаева мемлекет пен жеке кәсіпкерліктің әріптестігі туралы ой қозғады. Сөз алғандар өз пікірлерін ортаға салып, Елбасымен еркін әңгімелесті. Кездесуге қатысушылар Президент жүргізіп отырған саясатты бірауыздан қолдайтындықтарын білдірді. Сондай-ақ, Нұрсұлтан Назарбаевқа өңірдің әлеуметтік-экономикалық дамуы мен мемлекеттік индустриялық-инновациялық даму бағдарламасының жүзеге асырылу барысы туралы баяндалды.
Таланттар тәрбиеленетін ұя
Содан кейін Мемлекет басшысы облыс орталығындағы физика-математика бағытындағы Назарбаев зияткерлік мектебіне барды. Елбасы мектептің оқу сыныптарын, спорт залын, шығармашылық және ғылыми-зерттеу жұмыстары көрмесін аралап көрді. Интерактивті тақтада информатика пәнінің мұғалімі Пит Джо мен 12G класс оқушысы Айдана Шахаман «Мектеп бойынша 3D виртуальды тур моделі» жобасын ұсынды. Оқушылардың жоба жұмыстары көрмесінде Әсел Мергенова мен Жансая Хамиттің «Ақтөбе облысының электронды тарихи-экономикалық картасы», 10-сынып оқушысы Диана Бекенованың «Көкөністердің өсуіне вермикулиттің әсері», Амирмагруф Амантайдың және Назерке Төреханованың «Жергілікті және импорттық йогурттарды сапалық талдау» жобалары таныстырылды. «Болашақ» бағдарламасымен Финляндияда білім алып келген физика пәнінің мұғалімі Самат Шәріповтің ғылыми-зерттеу зертханасы таныстырылды. 12- сынып оқушыларының «Суды мұнай және майдан ластанудан тазартудың әртүрлі тәсілдері» деген тақырыптағы зерттеулерінің тұсаукесері болды.
Нұрсұлтан Назарбаев оқушылармен әңгімелесіп, оларға табыс тіледі және оқуда үздік нәтижеге жетулеріне ниеттестігін білдірді. Бұл мектепте қазіргі таңда 202 педагог маман, соның ішінде 125 мұғалім, 16 куратор, 8 тәрбиеші және 17 шетелдік азамат оқу-тәрбие жұмыстарын жүргізеді.
Жарқырап өткен жастық форумы
Елбасы Нұрсұлтан Назарбаев өңірге жұмыс сапарының соңында «Қоныс» спорт сарайында өткен «Жастық! Жігер! Еңбек!» атты республикалық жастар форумына қатысты. Форумға елдің барлық өңірінен үш мыңдай жастар өкілі жиналды. Жастар Елбасын «Нұрсұлтан! Қазақстан!» деген ұранмен тік тұрып, қарсы алды. Олар еліміздің Көк туын желбірете көтеріп, Спорт сарайының сәні мен салтанатын арттырды. Қазақстан Тәуелсіздігінің 25 жылдығы қарсаңында өткізіліп отырған жастар форумы еліміздің ертеңі жастардың қолында екенін тағы бір мәрте паш еткендей әсерге бөледі. Салтанатты сәтті көріп, бүгінгі күн жігерлі де талантты, арманшыл және оларды жүзеге асыруға қуатты жастардың уақыты екенін аңғарасың. Форумға қатысушыларға егемен еліміз туралы бейнефильм көрсетілді.
Мемлекет басшысы мұнда ел үміт артқан ең талапшыл жастар жиналғанын атап өтті.
– XXI ғасырды біз жаһандық сын-қатерлер дәуірі ғана емес, жас, қуатты және талантты адамдардың дәуірі деп те атаймыз. Қазақстанда бүгінде әрбір төртінші азамат – жас ұрпақтың өкілі. Мені сіздердің білімдеріңіз, шетел тілдерін меңгергендеріңіз, инновацияға ашық болуға талпыныстарыңыз қуантады. Араларыңызда ақылы мен білімі қазірдің өзінде Отанымызға пайдасын тигізіп жатқан жастар аз емес. Әлем жұрты көп ұзамай жаңа қазақстандық ғалымдар, дәрігерлер, инженерлер, музыканттар мен спортшылар туралы естіп-білетініне сенімдімін, – деді Нұрсұлтан Назарбаев.
Қазақстан Президенті жастар қазіргі уақытта ұсынылып отырған мүмкіндіктерді пайдалануы қажеттігін айтты.
– Біз заманауи білім беру жүйесін, зияткерлік мектептер, Астанада халықаралық университет аштық. Жыл сайын мыңдаған студентті әлемнің үздік университеттеріне жібереміз. Өмірдегі ең басты нәрсе – білім, жоғары кәсібилік және өз Отаныңа адалдық, мен сіздерді осыны есте ұстауға шақырамын. Сіздерде зор күш-қуат пен шығармашылық әлеует бар. Осының бәрін өмірлеріңіздегі ең басты мақсатқа жетуге бағыттаңыздар, – деді Мемлекет басшысы.
Нұрсұлтан Назарбаев біздің ел жастардың әлеуетін дамытуға және жүзеге асыруға қажетті жағдайлар жасап жатқанын айтты.
– «100 нақты қадам» Ұлт Жоспарында жастарды қолдауға бағытталған шаралар қарастырылған. «Жұмыспен қамтудың жол картасы-2020», «Бизнестің жол картасы-2020», «Дипломмен – ауылға!», «Жасыл ел» жобалары арқылы жарты миллион қазақстандық жас қамтылған. «Қолжетімді баспана» бағдарламасы аясында жас отбасыларға 3,5 мыңнан астам пәтер берілді. Бұл жұмыс әлі жалғасады. 2017 жылдан бастап әрбір орта мектеп түлегі мемлекет есебінен алғашқы мамандығын меңгеріп шығатын болады. Жаһандық дағдарысқа қарамастан, біз барлық ресурсты еңбек адамын қолдауға бағыттаймыз. Бұл біздің экономикамыздың дамуы үшін мультипликативті әсерді қамтамасыз етеді, қазақстандықтар үшін қуатты «әлеуметтік саты» қалыптастырады және жастардың игілігін арттырады, – деді Қазақстан Президенті.
Мемлекет басшысы бүгінде елімізде жолдар салынып, индустрия дамытылып, жаңа жұмыс орындары мен инновациялық кәсіпорындар ашылып жатқанына назар аударды.
– Сіздердің тың идеяларыңыз бен жастық жігерлеріңізді қажет ететін жүздеген, мыңдаған жұмыстар бар. 200 мыңдық сарбазы бар «Жасыл ел» акциясы нағыз ерлік болды, олар 10 жылда 115 мың гектар аумақта 50 миллион ағаш отырғызды. Осы игі миссияны жалғастырып, Қазақстанды жасыл әрі болашақ ұрпақ үшін таза өлкеге айналдыру керек. Сіздердің Универсиада мен халықаралық ЭКСПО-2017 көрмесін өткізу ісіне белсене қатысатындарыңызға сенімдімін. Осының бәрі сіздер үшін, сіздердің болашақтарыңыз бен еліміздің болашағы үшін жасалуда. Жастарымыз мемлекет қамқорлығына үздік оқумен, спорттағы және шығармашылықтағы табыстарымен, Отанына қызмет етуімен жауап береді деп сенемін, – деді Нұрсұлтан Назарбаев.
Соңында Қазақстан Президенті елдің барша жастарына сөз арнады.
– Сіздер – елдің болашағысыздар. Сіздер мен біздің ұлы мақсатымыз бар. Армандар ұмтылған кезде ғана орындалады. Қазақстан ХХІ ғасырда қуатты әрі өздеріңмен бірге өркендейтін ел болуы үшін сіздердің күш-жігерлеріңіз, ынтымақтарыңыз, табандылықтарыңыз бен таланттарыңыз жеткілікті екеніне сенемін, – деді Мемлекет басшысы.
Жастар форумында сөз алған Қазақстан армяндары ассоциациясының мүшесі, әнші Альбина Оганесян еліміздегі ұлтаралық бірлік пен татулық Президент саясатынан тамыр тартатынын жеткізді. Назарбаев зияткерлік мектебі директорының орынбасары, «Болашақ» стипендиясының түлегі Арнұр Мәденов осы бағдарламамен оқу бітірген 11 мың жас еліміздің көркеюіне үлес қосып жүргенін айта келіп, осындай қамқорлығы үшін Елбасына алғыс сезімін білдірді. «АрселорМиттал Теміртау» АҚ электр монтері Игорь Михайликов өзінің жұмысшы мамандығын таңдағанын Елбасының еңбек жолымен сабақтастыруы да сәтті шықты. Өзі еңбек ететін кәсіпорынның өнімі әлемнің 75 елінде сұранысқа ие екенін, Мемлекет басшысының еңбек адамына жағдай туғызып отырғанын ризашылықпен айтты.
Ал шығысқазақстандық Жұлдыз Жетпісова «Дипломмен – ауылға!» жобасының арқасында еңбек жолын бастап, тұрмыстық игіліктерге қол жеткізгенін, аталған жобамен елге барған 43 мың жастың осындай қолдауды сезінуде екенін айтса, боксшы, Олимпия ойындарының күміс жүлдегері Әділбек Ниязымбетов 800 мың жас спортпен айналысатынын жеткізді. Олар үшін 35 мың спорт нысаны жұмыс істейтіні Президенттің сарабдал саясатының арқасы екенін мәлімдеді. Рио де Жанейро Олимпиадасында Көк байрағымызды Олимп шыңына көтеруге барымызды саламыз, деп түйіндеді ойын боксшы.
Іс-шара барысында форумға қатысушылар «Гүлдене бер, туған ел!» жалпыұлттық марафон-эстафетасының басталғанын мәлімдеп, жастарды осы марафонға бір кісідей белсене қатысуға шақырды. Форумды елімізге белгілі жас өнер иелері әнмен әдіптеп, бимен бедерледі.
Сатыбалды СӘУІРБАЙ,
«Егемен Қазақстан».
Ақтөбе облысы.
Суреттерді түсіргендер
