12 Наурыз, 2016

«Жерде бір бала қуанса, көкте мың періште шаттанады»

2012 рет
көрсетілді
3 мин
оқу үшін
IMG_20151208_122441-1Қайырымдылық – адамның асыл қасиеттерінің бірі. Қайы­рым­дылық – көмекті қажет ету­шілерге беретін көмек және із­гіліктің нақты көрінісі болып та­былады. Қайырымдылық адам бойындағы асыл қасиеттерді дәлелдеуді қажет етеді. Алла Тағала Құран Кәрімнің «Тағабун» сүресінің 16-18 аяттарында «Шамаларың келгенше Алладан именіңдер, оның айтқанына бойұсыныңдар, Ал­ла жолында мал-мүліктеріңді жұмсаңдар. Бұл – өздерің үшін қайырлы. Кімде-кім нәпсі са­раң­дығынан сақтанса, ол – мақ­сатына жетуші. Егер Ал­ла ризалығы үшін дүние жұмса­саңдар, Алла оның есесін еселеп қайтарады. Алла береген, кеңпейіл, жазалауға асықпайды. Ол – құпияны да, әшкерені де білуші. Ол аса үстем хикмет иесі», деп пендесіне игі амалдар жасауды міндеттейді. Муслим жеткізген Пайғамбарымыз Мұ­хаммед (с.ғ.с) хадисінде «Ақи­қат байлық – мал-мүліктің көп болуы емес, ақиқат байлық – кеңпейілділік, қайырымдылық, ол – адамдағы ең жақсы қасиет», деп өсиет етеді. Павлодар облысы Ақтоғай ауданының Мүткенов ауылдық округінде Сәлкеновтер отбасы тұрып жатыр. Бұл отбасында 2005 жылы туған Ақтөре Қанатұлы – 3-топтағы мүгедек бала тәр­бие­ленуде. Қазірде аудандық коррекциялық орта­лықта тіркеуде тұр. Бала өз бе­тінше қимыл-қоз­ғалыс жасап, тамақтана алмайды. Өскелең баланың жүріп-тұруына бұрын­ырақта берілген арба кішірек болғандықтан, далада серуендеуде, үй ішінде көтеріп жүруде ата-ана көп қиналған. Ал арба сатып алу үшін отбасының қалтасы көтермейді. Сондай-ақ, Жоламан ауы­лының тұрғыны, 5-сынып оқу­шысы Қайыр Тоқтар – Ақ­бидай негізгі мектебінде үйде оқы­тылатын оқушы. Кіш­кен­тайында жүгіріп жүрген бала есейе келе айықпас дертке душар болды. Қазір мүгедектер арбасында та­ңылып отыр. Бұл көп балалы отбасының жасөспірім балаға жаңадан арба сатып алатын жағ­дайы жоқ. «Жерде бір бала қуанса, көк­­те мың періште шаттанады», дейді қазақ даналығы. Үл­кен байлықпен адамға үлкен қайы­рым бітпейді, керісінше, үлкен қайырымдылық – жиған байлығыңды абыройлы ете­ді. «Қолы ашықтың – жолы ашық» деген тағы бір сөз бар қазақта. Міне, қолындағы барымен тағдырдың тауқыметімен ғаріп күн кешіп жүргендердің алғысына бөленіп жүрген жандар да аз емес. Осындай жомарт жүректі адамдардың бірі – Сүлейменов Мақсұт Шәкенұлы. М.Сүлейменов – Павлодар қаласындағы «Фирма ДИЗ РV» ЖШС-нің басшысы. Кәсіпкер арбаға таңулы оқушы жастағы мүгедек балаларға қымбат баға­лы арбаны сыйға тарту етті. Мақ­сұт Шәкенұлы бұл сый-құр­мет Алланың ризашылығы үшін жасалып отыр, дейді өз сөзінде. Қайырымдылық шарасы Павлодар қаласындағы «Ақ ме­­шіттің» бас имамы Жол­дас Берді­мұратовтың ұйым­дас­тыруымен өтті. Кәсіпкер Мақсұт Шәкенұлы мүгедек балаларға арнаған арбасын осы мешітте табыстады. Мүгедек балалардың ата-аналары – Галина Бережная мен Сәлкеновтер отбасы Мақ­сұт Шәкенұлы мен Жолдас Қос­­па­құлына өз ризашылығын білдіре отырып, дін жолында жасаған амалдарының тек Бір Жаратушыдан ғана еселеніп қайтарылсын деп тілек білдірді.  Әсем МУНДУИНОВА, Ақбидай негізгі мектебі директорының оқу-тәрбие ісі жөніндегі орынбасары. Павлодар облысы.