Серіктестікке серпін қосар сенім

Кеше Ақордада Мемлекет басшысы Нұрсұлтан Назар­баевқа Біріккен Ұлт­тар Ұйы­мы Даму бағдар­ла­масының (БҰҰ ДБ) тұрақты өкілі Но­римаса Шимомура және Из­раильдің Төтенше және өкілетті елшісі Михаил Бродс­кий, Өзбекстан Республи­ка­сының Төтенше және өкі­летті елшісі Икром Назаров, Әзербайжан Республи­ка­сының Төтенше және өкі­лет­ті елшісі Рашад Мамма­дов, Таиланд Корольдігінің Тө­тен­ше және өкілетті елшісі Нат Пиниоваттаначип Сенім гра­мотасын тапсырды. Мемлекет басшысы бұл рәсім олардың жеке дипломатиялық тарихтарындағы жаңа белеске айналатынын айта келіп, олардың дипломатиялық миссияға ал­ғаш рет басшылық еткелі отыр­ғанына, қыз­меттерінің жаңа ке­зеңі Қазақстаннан бас­талғалы тұр­ғанына екпін берді. Одан әрі Елбасы елшілердің Қазақстандағы жауап­ты да мәртебелі миссияла­ры елдеріміз ара­сындағы ынты­мақ­тастықты жан-жақ­ты дамытуға септігін тигізетініне үмітте­не­тінін жеткізді. Сондай-ақ, Қазақстан Пре­зи­денті дип­ломаттар өз қыз­мет­теріндегі жаңа кезеңді Қазақстан Тәуелсіздігінің 25 жылдығы қар­саңында бастап отырғанын атап өтті. «Бұл тарихи тұрғыдан қысқа кезең біздің еліміз үшін ауқымды өзгерістердің дәуіріне айналды. Мемлекеттілікті нығайту, зама­науи нарықтық экономика құру, қоғам­ды жаңғырту жөнін­де орасан зор жұмыс атқары­л­ды. Бүгінде біздің елдің бас­ты си­­пат­тары – саяси тұрақ­ты­лық, этнос­­аралық және кон­фес­сияара­лық ке­лісім, ха­лықаралық істер­дегі се­німді­лік пен жау­аптылық, тиімді әлеу­меттік-экономикалық өз­ге­ріс­тер», – деді Мемлекет басшысы. Нұрсұлтан Назарбаев Қа­зақ­стан Үкі­меті мен Біріккен Ұлттар Ұйымы арасын­дағы 2016-2020 жылдарға арналған негіз­демелік серіктестік бағдарламасы ынты­­мақ­­тастықтың жаңа сапалы дең­гейіне шық­қанын көрсететініне назар аударды. «Біріккен Ұлттар Ұйымы Даму бағдар­ламасымен өзара іс-қимыл негізгі үш векторды қамтиды. Біріккен Ұлт­тар Ұйы­мының Семей облысын аймақтық дамыту жөніндегі бір­лескен бағдарламасын оң баға­лаймыз», – деді Елбасы. Сонымен бірге, Мемлекет бас­шысы Израильмен ынты­мақ­­тастықтың аясын кеңейте түсу­ге айрықша мән берілетінін айт­ты. «Сауда-экономикалық ынты­мақ­тастық біздің қарым-қаты­насымыздың маңызды бөлі­гі болып саналады. Бүгінде Қазақстанда Израиль капита­лының қаты­суымен жұмыс жүр­гі­зетін 270-тен астам кәсіпорын тіркелген. Қазіргі дағдарыс жағ­дайында барлық бағыттар бой­ынша қауымдасуды кеңейте түсу үшін күш жұмылдырудың маңызы зор. Ақпараттық технологиялар, инновация, медицина және ауыл шаруашылығы перспективалы салаларға айналып отыр. Аста­нада ЭКСПО-2017 халық­аралық көрмесін өткізу тұрғы­сынан біз Израильдің озық техноло­гияларына және баламалы энер­гетика саласындағы жаңалық­тарға мүд­деліміз. Израильдің Еура­зиялық экономи­калық одақпен еркін сауда аймағы жөнін­­дегі келісімге қол қоюға ұмтылы­сын біз қолдаймыз. Израильдің Пре­мьер-ми­н­истрі Биньямин Нетанья­худің Астанаға жоспарла­нып отырған ресми сапары екі­жақты байланыстарды терең­детуге серпін береді деп сенемін», – деді Нұрсұлтан Назарбаев. Қазақстан Президенті елі­міз­ді Өзбекстанмен және Әзербайжанмен туысқандық қаты­нас­тар мен ғасырлар тарихынан та­мыр тартатын достыққа, өзара құр­метке негізделген берік дәстүр­лер байланыстыратынын атап өтті. «Елдеріміз арасындағы ортақ шекара екіжақты қарым-қатынастардың жан-жақты дамуын алдын ала айқындап тұрады», – деді Мемлекет басшысы. Нұрсұлтан Назарбаев Қазақ­стан Өзбекстанды Орталық Азия өңіріндегі стра­тегиялық серіктес ретінде қарас­тыратынына назар аударды. «Өт­кен аптада Екі­жақты ынтымақтастық жөнін­дегі бірлескен үкіметаралық комис­сияның 15-ші отырысы өтті. Қол жеткен уағдаластықтарды жүзе­ге асыру Қазақстан – Өзбек­стан қатынастарын жаңа сапалы деңгейге шығарады деп сене­мін. Сауда-экономикалық және мәдени-гуманитарлық ынтымақ­тастықтың барлық бағыттары бойынша біздің тиімді ықпалдасуға мүмкіндігіміз бар. Өзбекстан Прези­денті Ислам Кәрімовтің біздің елге сапары кезінде жасал­ған уағдаластыққа сәйкес, мен мау­сым айында Ташкентке барып, сонда өтетін Шанхай ынтымақ­тастық ұйымының кезекті отыры­сына қатысуды жоспарлап отырмын», – деді Қазақстан Прези­денті. Мемлекет басшысы Әзер­байжан Қаз­ақстан үшін Кавказ өңіріндегі стра­те­гиялық серіктес екенін атап айтты. «Біздің елдері­міз энергетика және транзит-көлік, ауыл шаруашылығы, туризм, білім беру салаларында және басқа да бағыттар бойынша белсене ынтымақтасып келеді. Жақында ғана маған Әзербайжан Президенті Ильхам Әлиевтен Әзербайжанға ресми сапармен бару жөнінде шақыру келді. Мен бұл шақыруды ықыласпен қабыл аламын. Дипломатиялық арналар арқылы нақты мерзімін келісерсіздер», – деді Нұрсұлтан Назарбаев. Қазақстан Президенті Таиланд Қазақ­станның Оңтүстік-Шығыс Азия­­дағы маңызды серіктесі болып сана­ла­тынына тоқталды. «Астана мен Бангкок арасындағы өзара іс-қимыл өзара түсіністік және сенім ыңғайында дәстүр­лі түрде дамып келеді. Таиланд басшы­лығына Азиядағы өзара іс-қимыл және сенім шаралары жөніндегі кеңес үдері­сін, Әлемдік және дәстүрлі діндер лидер­лері съезі аясында дінаралық үнқаты­суды нығайтуға қосқан үлесі үшін зор ризашылығымызды білдіреміз. Біз Таиландпен туризм, ауыл шаруа­шылығы, энергетика және көлік ло­гистикасы салалары бойынша жемісті ын­ты­мақтастықты арттыра түсуге әзір­міз. Дүниежүзілік сауда ұйымы аясын­дағы тығыз қауымдасу сауда-эконо­микалық ынтымақтастықты дамыту үшін керемет мүмкіндікке жол ашады», – деді Мемлекет басшысы. Соңында Нұрсұлтан Назарбаев рәсімге қатысушыларды Астанадағы дипломатиялық жұмыстарының бас­талуымен және алдағы Наурыз мере­кесімен құттықтап, қонақжай Қазақстан жерінде өткізетін күндерінің жайлы болуына тілектестігін білдірді. «Сіз­­дердің қызметтеріңіз сенім мен өзара түсіністікті нығайтуға, екіжақты ынты­мақ­тастықтың әлеуетін барынша арттыра түсуге бағытталады деп сенемін», – деді Қазақстан Президенті. Н.Шимомура орнықты даму мақ­сат­тарына қол жеткізу үшін Қазақстан мен БҰҰ арасындағы сындарлы серік­тес­тіктің жалғаса беретініне сенім біл­дірді. М.Бродский Қазақстан мен Израиль халықтарын ортақ мүдде мен өзара ілтипатқа негізделген дәстүрлі достық қарым-қатынастар байланыстыратынын айтты. «Таяуда Қазақстан алғаш рет Алғыс айту күнін атап өтті. Біз үшін бұл – мереке. Ұлы Отан соғысы жылдары Қазақ­станға қоныс аударған еврейлерге көрсетілген қонақжайлылық үшін Сіздің халқыңызға тағы да алғыс білдірудің бір мүмкіндігіне айналды. Біз оны ешқашан ұмытпаймыз», – деді Израиль елшісі. И.Назаров Қазақстан және өзбек халық­тарының руханияты, тарихы және мәдениетінің ортақ сипатын атап өтіп, екіжақты ынтымақтастық аясын өзара тиімді негізде одан әрі кеңейте түсуге септігін тигізуге ниеттестігін жеткізді. «Қазақстан – Өзбекстанның маңызды сауда серіктесінің бірі. 2015 жылдың қорытындысы бойынша, екіжақты тауар айналымының көлемі 3 миллиард доллардан асты. Бұл салада зор әлеует бар», – деді Өзбекстан Республикасының елшісі. Р.Маммадов Қазақстан мен Әзер­байжан арасындағы саяси, экономикалық байланыстарды нығайту, білім беру, ғылым және мәдениет саласындағы тығыз қарым-қатынастарды жолға қою үшін өзінің бар күш-жігерін жұмсайтынын айтты. Бұдан бөлек, елші барша Қазақстан халқын келе жатқан Наурыз мейрамымен құттықтады. Н.Пиниоваттаначип Қазақстан мен Таиланд арасындағы серіктестік қарым-қатынас түрлі сала бойынша қарқынды өрістей береді деп үміттенетінін айта келіп, еліміздің халқына игілік пен бақ-береке тіледі. Жолдыбай БАЗАР, «Егемен Қазақстан».