Әркім өз міндетіне дайын

Қазақстан Республикасы Парламенті Мәжілісі мен жергілікті мәслихаттар сайлаулары жақындаған сайын оған тыңғылықты дайындық шаралары   қыза түсуде. Саяси науқанға әзірлік жайлы БАҚ өкілдерімен өткізген брифингте Сайлауды байқау жөніндегі республикалық қоғамдық комиссияның жергілікті филиалының жетекшісі Сергей Худяков егжей-тегжейлі айтып берді. Ол өз сөзінде өңір аумағында 697 сай­лау учаскесі құрылғанын, ал 929 сайлау комиссиясы құрамына 6,5 мыңнан астам бел­сен­дінің тартылғанын айта келіп, қоғам­дық қадағалаушылардың тас-түйін әзір­лігіне көңілі толатынын білдірді. Олар­ға байқаушының күнделігі, қысқаша нұс­қаулығы, атқарылған жұмысты қабылдау бойынша келісім актісі, заң бұзушылықтар туралы акті үлгісі, бай­қау­шының куәлігі, тағы басқа қажетті мате­риалдар топтастырылған құжаттар топтамасы үлес­тірілгенін жеткізе келіп, Сергей Героль­до­вич үйлес­тіруші ұйымдар тарапынан оқыту, кеңес беру, саяси білімдерін жетілдіру семинарлары қадағаланып отыратынын, осындай жоғары талаптар қою арқылы ғана сайлауды талапқа сай өткізуге болатынын алға тартты. Облыстық сайлау комиссия­сын­да және партиялық тізім бо­­йын­ша Парламент Мәжілісі сай­лауына қатысуға жолдама ал­ған алты саяси партияның сайлауал­д­ы штабтарында болған филиал жетекшісі өз тәжі­рибесімен бөліс­ті. Саяси ұйым­дар тарапынан ешқан­дай заң бұзушылық байқал­ма­ған. Жергілікті атқару­шы билік өкіл­деріне қатысты өтініш-тілек­тер біл­дірмеген. Көрнекі үгіт-на­си­­хат құ­ра­л­дары да талапқа сай ор­­­­н­а­тылған. Үгіт-на­си­хат мате­риал­дарын бұқаралық ақпарат құ­рал­дарына орналастыруда бірізділік қатаң сақталған. Ол келтірген мәліметтер бойын­ша облыс­тық мәслихатқа – 31, қала­лық мәс­ли­хатқа – 19, аудандық мәслихаттарға 167 депутат сай­лануы тиіс. Жергілікті мәсли­хаттар деңгейіндегі үміткерлер саны – 661. С.Худяков саяси партиялар өкілдерімен кездескенін, олар­дың тарапынан да сайлау ту­ралы заңнамалар талаптарының орын­­далып жатқанын, жеке аты­на да, об­лыстық штабқа да сай­лау­шылардан, саяси партия мүше­лерінен, сенім білдірілген адамдардан ешқандай арыз-шағым түс­пегенін жеткізді. Әр сайлаушы өз сайлау учас­кесіне барып, тізімде бар-жоғын тексере алады. Қосым­ша тізім арқылы басқа жақта дауыс беру құқы­ғына ие. Бүгінде 51 елде 65 сайлау учас­кесі ашылған. Олардың бесеуі көрші елде орналасқан. Дания мен Ресейден келген екі бай­қаушы аудандарды аралап, сайлауға әзірлік шараларымен танысып жүр. Олардың қатары молығатын болады. Қазіргі ахуалға қарағанда, сайлаудың ашық та мөлдір өтетініне сенімдімін, деп сөзін түйіндеді Сергей Герольдович. Өмір ЕСҚАЛИ, «Егемен Қазақстан». Солтүстік Қазақстан облысы.