Міндеттеріне мығым, құқықтарына жетік

Күн өткен сайын Пар­ла­мент Мәжілісі мен мәсли­хат­тар сайлаулары жақындап келеді. Сайлаудың заңды және әділ өтуі басты назарда ұсталуда. Кеше «Қазақстан Респуб­лик­а­сындағы сайлауды байқау жөнін­дегі республикалық қоғамдық комиссия» республикалық қоғамдық бірлестігі Ақтөбе облыстық орталығында алда болатын сайлау науқанында байқаушылардың жұмысына байланысты екінші мәрте брифинг ұйымдастырды. Брифингке қала, аудандардан байқаушылар, БАҚ өкілдері қатысты. Басқосуда сөз алған облыстық орталық жетекшісі Халел Құ­сайынов байқаушылардың дені бұрынғы өткен сайлауларға бай­қаушы ретінде қатысқан тәжірибелі адамдар – қоғамдық ұйымдар өкілдері, ғалымдар, оқы­­тушылар, облыс жастары еке­нін тілге тиек ете келіп, оларға бай­қау­шылар үшін әдістемелік құралдар, жадынамалар табыс­талғанын жеткізді. Облыс бойынша 526 сайлау учаскесі құрылған, оның ішінде 133-і қала аумағында, қалған 393-і аудандарда орналасқан. Бар­лық сайлау учаскелері сайлау нау­қанына дайын, Қазақстан заң­дары аясында жұмыс жасауда. «Штабтың 11 мүшесі бар. Сай­лау­дың әділ де шынайы өтуін 530 байқаушы қадағалайтын болады. Аудандарда селекторлық жиналыстар және барлығы 11 семинар-тренинг өткізілді. Оларда сайлауды байқаушылардың негізгі міндеттері мен құқықтары түсіндірілді. Соның біріне «Қа­зақ­стан Республикасындағы сай­лауды байқау жөніндегі респуб­ликалық қоғамдық комиссия» РҚБ төрағасының орынбасары Әділ Ахметов қатысты, партиялардың облыстық филиалдары штабының басшыларымен кездесіп, сайлауалды науқан барысы, сайлауға қоғамдық байқау ұйымдарының қатысуының маңыздылығы жөнінде әңгімеледі», – деді орталық жетекшісі Х. Құсайынов. Ол сайлау күніне дейін әлі де бірнеше семинар өткізілетінінен хабардар етті. Осы кезге дейін сайлау науқанын ұйымдастыру бойынша ешқандай ескертулер мен ұсыныстар және саяси партиялар немесе мәслихаттарға кандидаттардың сайлауалды үгіттерін жүргізу барысында құ­қық бұзушылықтар дерегі туралы арыз-шағым түспегенін айт­ты. Оның мәлімдеуінше, облыс тұрғындары тарапынан Пар­ламент Мәжілісі мен мәслихат­тар сайлауларына үлкен қызығу­шылық байқалады. Сатыбалды СӘУІРБАЙ, «Егемен Қазақстан». Ақтөбе облысы. Суретті түсірген Хайреден РАУШАНОВ.