17 Наурыз, 2016

Боран

615 рет
көрсетілді
2 мин
оқу үшін
БоранНаурыз айы орта белінен асқан кезде батысқазақстандықтар аяқ астынан көзді аштырмайтын ақтүтек боран соғады деп ойламаған еді. Ышқынған желдің екпіні атан түйені жығардай тым қатты болды. Ұйтқи соққан боранымен жарысып жауған қар Орал өңірінің қаласын да, даласын да бір демде ақ көрпеге орады да тастады. Жойқын желдің әсерінен қалада және облыстың бірқатар жерінде электр желілері үзіліп, көше бойларындағы билбордтардың мата тектес материалдары жыртылып жатты. 15 наурыз күні кешкі сағат 21:00-дің шамасында басталған боран таң ата бір-ақ саябырлады. Әдетте төтеншеліктер қатты боранның болатынын, желдің жылдамдығы күшейетінін алдын ала хабарлаушы еді. Сірә, аталған қызмет өкілдері мен ауа райын анықтаушылар бұл жолы күтпеген жерден, өткен қыс айларының өзінде болмаған боранның басталып кететінін болжай алмай қалған секілді, дейді Орал қаласының тұрғындары. Шалғайдағы Қазталов және Бөкей ордасы аудандарынан жеткен хабарларға қарағанда, алағай да бұлағай қатты жел, боран ке­зінде көктен түскен қарды үр­леп, елді мекендердің іргесіне үйіп тастаған. Қардың үйлер мен әкімшілік ғимараттардың есік, терезелерін басып қалғаны соншалық,таңертең сыртқа шы­ғатын есіктерді ашудың өзі қи­ынға түскен. Ал ішіне емес, сырт­қа қарай ашылатын есіктерді ашу тіпті мүмкін болмады, деп хабарлады Қазталов ауданындағы әріптесіміз Серік Жұмағалиев. Міне, сөйтіп, кешегі күні нау­рыздың қары Ақжайық атырабын белуардан келетін ақ көрпеге орады да тастады. Әрі бұл құбылыс жылдың жақсы болатынының бір хабаршысы, деп жатты өңірдегі көнекөз қариялар. Темір ҚҰСАЙЫН, «Егемен Қазақстан». Батыс Қазақстан облысы.