Қарағандыда автопарк қызметкерлері ереуілге шықты

ҚАРАҒАНДЫ. 17 наурыз. Қарағандыда №3 автопарктің жүргізушілері мен кондукторлары еңбек дауы бойынша өз құқықтарын қорғап, ереуілге шықты. Бұл туралы egemen.kz тілшісі хабарлады. Дизель отынының қымбаттауына байланысты күнделікті жоспардың 800 теңгеге көтерілгеніне қарсы болған жүргізушілер мен кондукторлар өз наразылықтарын ашық түрде білдірді. Ереуілге №3 автопарктің отызға тарта жүргізушісі қатысып, маршрутқа кәсіпорын автобустарының 20 пайызы шыққан жоқ. «Еңбек дауына» қатысушылармен кездесуге қала әкімі Нұрлан Әубәкіров пен орынбасары Арман Жұмекенов келді. Нәтижесінде билік пен тасымалдаушы кәсіпорын ортақ ымыраға келіп, түстен кейін ереуілге қатысқан автобустардың бәрі маршрутқа шықты. №3 автопарктің директоры Артур Григорян қала басшыларының кәсіпорынға бұрынғы бағамен дизель отынын жеткізу бойынша көмектесуге уәде бергенін мәлімдеді. Қайрат Әбілдинов. Дерек: egemen.kz. Сурет: dailynews.kz.