Елімізде педофилдерге химиялық кастрация жасалатын болды

АСТАНА. 17 наурыз. Енді педофилдерге химиялық кастрация жасалатын болады. Мұны Парламенті Сенатының жалпы отырысында сенатор Бірғаным Әйтімова мәлімдеді. Бұл туралы kazinform.kz-ке сілтеме жасаған egemen.kz хабарлады. Парламент Сенатының отырысында «Қазақстан Республикасының кейбір заңнамалық актілеріне баланың құқықтарын қорғау мәселелері бойынша өзгерістер мен толықтырулар енгізу туралы» заң қабылданды. Заң жобасында жетім және ата-ана қамқорлығынсыз қалған балалардың республикалық деректер базасын жасау қамтамсыз етіледі. Сондай-ақ, балалар үйінде тәрбиеленетін сәбилер мен жасөспірімдер санын азайту мақсатында «қонақ отбасы» жобасы енгізілмек. Онда ауыр қылмыстар үшін сотталғандарға, өтелмеген сотталғандығы бар адамдардың балаларды асырап алуына тыйым салынады. Жалпы отырыста Бірғаным Әйтімова: «Химиялық кастрация бұл – уақытша шара, бұл бір реттік инъекция болады. Яғни, инъекция жасалғанан кейін ол өмір бойы осындай болып қалмайды. Инъекция сот және медициналық ұйым шешімі шыққаннан кейін жасалады. Осылайша, бір баланың болса да өмірін қорғап қалсақ, бұл дұрыс шешім деп ойлаймын», – деді. Айта кетейік, қабылдаған заң Мемлекет басшысының қол қоюына жолданады. Талғат Райымбек. Дерек: kazinform.kz. Сурет: rifey.ru.