Иорданияда жолаушылар автобусы апатқа ұшырады

АСТАНА. 17 наурыз. Иорданияның Сауд Арабиясымен шекаралас аймағында жолаушылар мінген автобус апатқа ұшырап, 16 адам қаза тапты. Бұл туралы РИА «Новости» ақпарат агенттігіне сілтеме жасаған egemen.kz тілшісі хабарлады. Associated Press агенттігінің хабарлауынша, автобус Мекке қаласына бағыт алған. Алғашында 14 адамның мерт болғаны туралы ақпарат тарағанымен, дәрігерлер ауыр жарақаттан тағы екі адамның көз жұмғанын мәлімдеді. Ал қаза тапқандар арасында екі нәресте бар. Валид Рувад есімді дәрігер бірнеше адамның жағдайы тым ауыр болғанына байланысты мемлекет астанасындағы ауруханаға ауыстырылғанын айтты. Petra агенттігінің ақпарынша, жүргізуші рульге ие бола алмағанының салдарынан 67 адам мінген автобус аударылған. Қазіргі кезде оқиға орнында полиция қызметкерлері тергеу амалдарын жүргізіп жатыр. Аян Әбдуәли. Дерек: РИА «Новости». Сурет: lenta.ru.