Мектеп бітірушілер ҰБТ-ны екінші мәрте тапсыра алады

АСТАНА. 17 наурыз. Білім және ғылым министрлігі мектеп түлектеріне екінші рет Ұлттық бірыңғай тестілеуді тапсыруға мүмкіндік береді. Бұл туралы bnews.kz-ке сілтеме жасаған egemen.kz тілшісі хабарлады. Елімізде Ұлттық бірыңғай тестілеуді тапсырмайтындардың қатары жылдан жылға көбейіп келеді. Мәселен, биыл тест тапсырмайтын 46 мыңға жуық түлектің бар екендігі белгілі болды. Мектеп бітірушілердің көбісі көршілес елдердің оқу орындарына түсуді жөн көреді. «Осы мәселеге байланысты алдымызда Елбасымыз қойған тікелей тапсырма тұр. Биыл жастарымызға өз еліміздегі оқу орындарына түсу үшін мүмкіндік бергіміз келеді. Бұл ретте колледж түлектері ескеріледі. Әрине, жоғары оқу орындарын бітіргендердің барлығы бірден жұмысқа орналаса алмайтындығы белгілі. Алайда, өзге елдер сияқты біз де жоғары білімді қоғамға ұмтылуымыз қажет. Соңғы 40 жыл ішінде әлемдегі студенттер саны 6 есеге өсті. Жыл сайын дүние жүзінде жоғары оқу орындарына 150 миллион адам түседі. Ал 10 жыл ішінде бұл көрсеткіш 50 пайызға артты», – деді Білім және ғылым министрі Ерлан Сағадиев. Аян Әбдуәли. Дерек: bnews.kz. Сурет: z-taraz.kz.