Заң бұзушылық тіркелген жоқ

Сайлау учаскелерін аралау кезінде жауапты науқанды қадағалаушылар қатарынан Сайлауды байқау жөніндегі республикалық қоғамдық комиссияның жергілікті өкілдерін жиі ұшыраттық. Оның себебін білу мақсатымен құрылымның Солтүстік Қазақстан облысы бойынша орталығының төрағасы Сергей ХУДЯКОВТЫ сөзге тартқан едік. – Оның ешқандай құпиясы жоқ, – деп бастады сөзін Сергей Героль­дович. – «Ерте тұрған еркектің ырысы артық, ерте тұрған әйелдің бір ісі артық» демекші, Пар­ламент Мәжілісі мен жер­­гілікті мәслихаттар сай­лауының еліміздің жар­қын келешегі үшін маңыз­дылығын се­зін­ген қоғамдық қада­ға­лау­шылар тас-түйін әзірлікпен келіп, құрамына білікті де білімді, сая­си, құқықтық жағынан сауатты 600-ге жуық адам тартылды. Араларында жастар көп. Семи­нарларда қосымша білім беру міндеттері жүктеліп, нә­тижесінде саяси науқанды бастан-аяқ білгірлікпен атқара білетін кәсіби мамандар шоғыры дайындалды. Ол үшін облыстық, аудандық, қалалық мәслихаттарға – 615, саяси партиялар атынан – 214 , өзін-өзі ұсыну жолымен 401 үміткердің тіркелгені, олардың арасынан 217 адамның ғана електен өткендей депутаттық мандат алатыны, тартыс аса күшті болатыны алдын ала болжанып, сайлау, заң нормаларын жетік білулері, ара-жігі айырып түсіндірілді. 15 аумақтық, 217 округтік, 697 учаскелік сайлау комиссия­лары шеңберінде 391320 сайлаушы, оның ішінде 146 мыңнан астамы Петропавл қаласында шоғырланғаны ескеріліп, негізгі күш-ж­і­­­гер облыс орталығына жұ­­мылдырылды. 929 сайлау комиссиялары құ­рамындағы 6,5 мыңға жуық белсен­ділермен, сондай-ақ, сая­си партиялардың се­нім­ді өкілдерімен, жас­тар ұйымдарымен, қоғамдық бірлес­тіктермен тығыз қарым-қатынас орната отырып, бар назар демократия құндылықтарын сақтауға аударылды. Бұдан тысқары, әр учаскеде 50-ден 2500-ге дейін, ал орта есеппен алғанда 560 сайлаушыдан келетіні де ескеріліп, әркімнің өз міндетіне жауапкершілігі барынша арттырылды. Тәуелсіз Мемлекеттер Достас­тығы атынан ат ізін салған (Ресей) 17 жә­не Даниядан /ЕҚЫҰ/ келген 1 байқау­шымен іскерлік байланыс орнатылып, барлық деңгейдегі сайлау учаскелеріне өкілдеріміз жіберілді. Осылайша, Қазақстанның сайлау жүйесін жетілдіруге барынша күш са­лынып, саяси науқанға әзірлік қай­наған қызу іс үстінде сыналып, таң­даудан қателеспегенімізді көр­сетті. Сайлау учаскелерінде орын алған олқылықтар тиісті орындарға іле хабарланып, олардың тізе қосуымен алдын алу шаралары қолданылды. Арыз-шағымдар көбіне бір жерде тұрақты тіркеуде алынып, бірақ басқа мекенжайда тұратын азаматтар тарапынан туындағанын айтқан жөн. Бұл олқылықтар же­ке тұлғалар кінәсінен болса да, олар дереу түзетілді. Сөйтіп, адамдардың алаңсыз таңдау жасауларына то­лық мүмкіншілік берілді. Ден­саулығы дімкәс, жүріп-тұруы қиын жандардың үйлерінде дауыс беру жайы да қадағаланып, олармен бірге өкілдеріміз ілесіп жүрді. Өрескел заң бұзушылық фактілері орын алған жоқ. Өркениетке бет ал­ған мемлекетте заң үстемдік құрады. Сайлауды байқау жөніндегі респуб­ликалық қоғамдық комиссиясы жер­гілікті филиалының сайлаудың әділ де жоғары деңгейде өтуіне үлес қосқаны тиісті орындар тарапынан лайықты бағасын алғаны қуантады. Ең бас­тысы, сайлауға қатысқан барлық пар­тияларға тең мүмкіндік берілді. Парла­ментке іскер, кәсіби біліктілігі жоға­ры адамдардың келуіне бәріміз де тілек­теспіз. Жазып алған Өмір ЕСҚАЛИ, «Егемен Қазақстан». Солтүстік Қазақстан облысы. Суретті түсірген Амангелді БЕКМҰРАТОВ.