Үгіт жұмыстары заңға сәйкес жүргізілді

Үгітті қоса алғанда, дауыс берілетін күннің алдындағы барлық іс-шаралар «Қазақстан Республикасындағы сайлау туралы» Конституциялық заңға сәйкес жүргізілді. Мемлекеттік органдар тарапынан қандай да бір заң бұзу­шылықтар тіркелген жоқ. Бұл туралы кеше Пре­зидент жанындағы Орталық коммуникациялар қызметінде өткен баспасөз мәслихатында Бас прокуратураның  ресми өкілі Нұрдәулет Сүйіндіков мәлім етті. «Конституцияға және Мем­лекет басшысының тапсырмасына сай, Бас прокуратура ағым­дағы сайлау процесінің заң­дылығын қамтамасыз ету бойынша барлық қажетті шара­ларды қабылдады. Электо­рат­­тық кезеңде азаматтардың конс­ти­туциялық құқықтарының жә­не сайлау заңнамасының сақта­лу мәселелері прокурор­лар үшін жұмыстың негіз­гі ба­сым­дылығы болып бел­гі­ленді», деді Бас прокуратураның ресми өкілі. Тек сайлау алдындағы үгітті жүргізу шарттарының жекелеген бұзушылықтары орын алған. Нақты айтқанда, Шығыс Қазақстан облысының Зырян ауданында прокуратура учаскелік сайлау комиссиясының төрағасы А.У.Жүнісоваға қатысты мәсли­хат депутаттығына канди­дат­тардың бірін қолдаумен сайлау алдындағы үгіт жүргізгені үшін әкімшілік іс қозғаған. Жүнісова комиссия төрағасының мін­деттерін атқарудан босатылып, сондай-ақ, оны сот 30 АЕК мөл­шеріндегі айыппұл түрінде әкім­шілік жауапкершілікке тартқан. Сонымен қатар, Шымкент қаласының Қаратау ауданын­да қалалық мәслихаттың депутат­тығына кандидаттың үгіттеу материалдарын бүлдіргені үшін қала тұрғыны Ж.К.Бубеев әкімшілік жауапкершілікке тартылыпты. Сондай-ақ, сайлау алдындағы үгітті жүргізу ережелерін бұзу фактілері бойынша прокуратура елорданың үш тұрғынына заңды бұзуға жол берілмейтіні туралы алдын ала ескерту жариялаған. «Прокуратура органдары сайлау заңнамасының бұ­зылу фактілері бойынша өзге қадағалау актілерін енгізген жоқ. Дауыс берiлетiн күннің алдындағы кезеңде Парламент Мәжілісіне сайлау бойынша прокуратура органдарына үш өтініш қана келіп түсті. Мысалы, Валентина Безрукова Парламент Мәжілісінің депутаттығына өзін өзі ұсынған кандидат ретінде тіркеуден бас тартқан сайлау комиссияларына шағымданған. Оған кандидаттарды ұсыну саяси партиялармен ғана жүзе­ге асырылатындығы түсін­ді­рілді. Жалпы, сайлау заңнама­сының қандай да бір елеулі бұзу­шылықтарының болмауы, біздің пікірімізше, ағымдағы сайлау процесінің барынша ашық және заңды екендігін куәландырады», деді Н.Сүйіндіков. Ол, сондай-ақ, сайлау күні, яғ­ни кешегі күнге қатысты да ақпараттармен бөлісті. «Қазақ­стан Республикасындағы сайлау туралы» Конституциялық заңға сәйкес, сайлау күні прокуратура органдары үшін жұмыс күні болып табылады және сол күні түскен өтініштер дереу шешілетін болады. Орталық дең­гейде де, жергілікті жерлерде де сайлау комиссияларымен және мүдделі мемлекеттік органдармен біздің үздіксіз бай­ланысымыз орнатылған. Сай­лау учаскелерінде қоғамдық қауіп­сіздікті полиция органдары қамта­масыз етті. Электораттық нау­қан сияқты сайлау күні де байсалды жағдайда өтті. Аза­мат­тардың сайлау құқықтарының бұзылуы немесе өзге елеулі құқыққа қайшы іс-әрекеттер тір­келген жоқ», деп мәлімдеді Бас прокуратураның ресми өкілі. Кешегі күнгі сағат 16.00-дегі жағдай бойынша прокуратура органдарына 8 өтініш түс­кен. Мәселен, Астанада проку­ра­тураға партиялардың бірінің өкілі Рахымжановтан жәшiк­тердің байқалуына жағ­дай жасауды қамтамасыз етпе­гені үшін №78 учаскенің сайлау комис­сиясының төраға­сы­на шара қолдану туралы екі ұқсас өтініш түскен. Оңтүс­тік Қазақстан облысында Со­зақ ауданының прокуратура­сына Г.Жақайқызы (аудандық мәс­лихатқа кандидат У.Шүкеева­ның сенім білдірілген адамы) кан­ди­даттардың бірінің жақтас­тары дауыс беру үшін келген адамдардың фото/бейнетүсірілімін жүргізгендігіне шағымданған. Аталған өтініштер құзыреті бойынша сайлау комиссияларына жолданған. Н.Сүйіндіковтің айтуынша, Шығыс Қазақстан облы­сы Аягөз ауданының прокура­ту­расына аудандық мәслихат­қа кандидаттардың бірінің сенім білдірілген адамы А.Сү­лей­менова басқа кандидаттың сенім бiлдiрілген адамы оның ар-намысы мен қадiр-қасиетін қорлағаны туралы арызбен жүгінген. Өтініш қарау үшін полицияға жолданған. Осы облыста А.А.Кузнецов емдеу мекемелерінің бірінің пациент­терін сайлаушылар тізіміне енгізі­луінің негізділігіне қатыс­ты прокуратураға арызбен жүгінген. Аталған өтінішті арызданушы дереу қайтарып алған, осыған байланысты қараусыз қалды­рылыпты. Қалған өтініш­тер бойынша оларда көрсетілген бұзушылықтардың белгілері туралы ақпараттар тексерілуде. Динара БІТІКОВА, «Егемен Қазақстан».