Сұрау салу нәтижелері жарияланды

«Демократия институты» ғылыми-зерттеу ассоциациясы Еxit-poll технологиясы бойынша сайлау учаскелерінен шыққан сәтте сайлаушылар арасында республикалық сауал­дама жүргiздi. Еxit-poll-дың қорытындылары мынадай: «Нұр Отан» партиясы – 82%, «Қазақ­стан­ның Коммунистік халық партиясы» – 7,17%, «Ақ ­жол» партиясы – 7,22%, «Бірлік» партиясы – 0,35% , Жалпыұлттық социалистік-демо­кра­тиялық партия – 1,21%, «Ауыл» партиясы – 2,05%. Зерттеу еліміздің барлық 14 облысында және Астана мен Алматы қалаларында жүр­гі­зіліп, оған 75 мың сайлаушы қатысты. Сауал­да­мамен жалпы 750 сайлау учаскелері, оның ішінде 513 қалалық, 237 ауылдық сай­лау учас­келері қамтылды. Зерттеу КТК телеарнасының тапсырысы бойынша жүргізілді. * * * Парламент Мәжілісінің депутаттарын сайлау күні «Қоғамдық пікір» зерттеу инс­титуты Закон.кз ақпараттық порталының тапсырмасымен Exit-polle-стандартты әдістемесі бойынша дауыс беріп, сайлау учаскесінен шыққан сайлаушылар арасында сауалдама жүргізді. Сайлау учаскелеріне келушілерге «Сіз қай партияға дауыс бердіңіз?» деген сұрақ қойылған. Сауалдама еліміз бо­йынша 110 сайлау учаскесінде жүргізілген. Сайлау учас­кесінен шыққан әрбір бесінші сайлаушыдан жауап алынған. Аталған сауалдамаға барлығы 30 мың адам қатысыпты. Іріктеме қателігі +/- 0,8%. Сауалдамаға еліміздің барлық аймақтарынан 200-ге жуық респондент тартылған. «Нұр Отан» партиясының көр­сеткіші – 82,15%, Қазақстанның Ком­му­нистік ха­лық партиясыныкі – 7,15%, «Ақ жол» демо­кра­тия­лық партиясыныкі – 7,17%, «Бір­лік» пар­тиясыныкі – 0,31%, Жалпы­ұлттық социал-де­мократиялық партиясыныкі – 1,19% және «Ауыл» партиясыныкі – 2,03%. Қай партияның аты озады деп келген сай­лау науқаны да кеше өз мәресіне жетті. Осы­ған орай кеше Қазақстан Республикасы Парла­менті Мәжілісі депутаттарын сайлау күні «Медиа Консул» агенттігі Еxit-poll әдістемесі бойынша әлеуметтік сауалдама жүргізді. Аталған әлеуметтік сауалдама «Бас редакторлар клубы» қоғамдық бірлестігінің тапсырысы бойынша жүргізілді. Сұрау салынғандар кездейсоқ іріктеліп, әрбір бесінші сайлаушы сауалдамаға қатысқан. Зерттеу еліміздің барлық өңірлерінің, қала мен ауыл тұрғындарының саны тең болатындай 225 сайлау учаскесінде жүргізілген. Сауалдама жүргізуге 267 сұхбат алушы тартылса, олардың жұмысын 16 өңірлік менеджер үйлестіріп отырған. Оған еліміздің барлық өңірінен 40 050 адам қатысқан. Сайлаушыларға «Сіз қандай саяси партия үшін дауыс бердіңіз?» деген сұрақ қойылған. «Нұр Отан» партиясына сайлаушылардың 81,95 пайызы өз дауыстарын беріпті. Ал Қазақстанның «Ақ жол» демократиялық партиясына сайлаушылардың 7,24 пайызы және Қазақстанның Коммунистік халық партиясына 7,22 пайызы өз таңдауларын жасапты. Бұдан кейінгі орынға 2 пайыздық нәтижемен «Ауыл» халықтық-демократиялық партиясы жайғасқан. Бұл жолғы сайлауда Жалпы­ұлттық социал-демо­кратиялық партиясы сайлаушылардың 1,20 пайыздық дауысын иеленген. Жаңадан құрылымдалған «Бірлік» саяси партиясы үшін сайлаушылардың 0,39 пайызы ғана өз сенімдерін білдірген. Іріктеудегі орташа қателік 0,69 пайыз. –––––––––––– Суретті түсірген Ерлан ОМАРОВ.