Футзалдан Қазақстан құрамасы сырт алаңда Польшамен тең ойнады

АСТАНА. 23 наурыз. Футзалдан Қазақстан құрамасы әлем чемпионатына іріктеу сатысында Польшамен кездесіп, 1:1 есебімен тең түсті. Бұл туралы egemen.kz тілшісі хабарлады. Матч Польшаның Щецин қаласында өтті. Ойынның 4-минутында Қазақстан құрамасының ойыншысы Серік Жаманқұлов есеп ашып, командамызды алға шығарды. Бұдан кейін қос команда да бірқатар жойқын шабуылдар ұйымдастырғанымен, гол соғылмады. Тек ойынның аяқталуына 27 секунд қалғанда алаң иелері сапынан Марсин Миколаевич мергендігімен көзге түсіп, таразы басын теңестіріп кетті. Енді қарсыластар 12 сәуір күні Алматыда қарымта кездесу өткізеді. Сол ойында жеңіске жеткен команда осы жылдың 10 қыркүйегі мен 2 қазаны аралығында Колумбияда өтетін футзалдан әлем чемпионатына жолдама алады. Аталған доп додасына 24 құрама қатысатынын атап өткен жөн. Еламан Қоңыр. Дерек: egemen.kz. Сурет: kairat-futsal.kz.