30 Наурыз, 2016

Керуеннің бұйда байлары – Ақтөбе

311 рет
көрсетілді
2 мин
оқу үшін
2380_okoКөктемнің алғашқы айы да та­рихи оқиғаларымен тарих пара­ғына соңғы күндерінің де­регін жазып қалдыруда. Биыл Оң­түстікке «ақ киімді денелі ақ сақалды, соқыр, мылқау танымас тірі жанды» қысыңыз қонаққа келмеді десе де болады. Осыны пайдаланған диқандар пленка астына егетін көшеттерін жерге сіңіріп үлгерді. Азық-түлік, оның ішінде көкөніс, бау-бақша, ет өнімдері басқа өңірлерге қарағанда Оңтүс­тік Қазақстанда арзан. Мысал үшін айтайық, картоп деген дақыл биыл көтерме базарда 40-50 теңгеден сатылды. Республика бойынша жылы­жайлардың 87 пайызы Оң­түс­тікке тиесілі болғандықтан қы­занақ, қиярларыңыз да өзге об­лыстарға қарағанда бағасы төмен. Ал сарышұнақ аяз, қалың қар­дан енді құтылып, есін жинаған өңірлерге көкөніс әбден керек. Осыны ескерген облыс әкімі Бейбіт Атамқұловтың бастамасымен Ақтөбе облысына 175 тонна азық-түлік жөнелтілді. Шым­кенттегі халықаралық жолға тоғысатын жол аймағынан 76 тонна көкөніс, 32 тонна ет және 14 тонна картоп тиеген керуен сапарға аттанып кетті. Олар Ақтөбеге жеткен соң ауылшаруашылық жәрмеңкесін ұйымдастырады. Оңтүстік Қазақ­стан облысы – аграрлы облыс. Өңірде 45 ет өңдейтін, 38 сүт фабрикалары, көкөніс және жеміс-жидектерді өңдейтін 35 кәсіп­орын бар. Жоғарыда аталған өнімдерден бөлек, жәрмеңкеде сәбіз, пияз, балық және сүт өнім­дері, жұмыртқа саудаланады. Керуенді аттандырған ауыл ша­руашылығы басқармасы өкілдері бұл тауарлардың 15 пайыз жеңіл­дікпен сатылатындығын айтады. Ертеде бір кейуана соғым сой­ғанда келініне «мынаны ұзын сары келгенде асарсың» деп жал-жая, қазы-қартадан бөлек сыбаға дайын­датқан екен. Көктемнің ең ұзақ күндерін, жуанның жі­ңішкеріп, жіңішкенің үзілетін көкөзек шағын халқымыз «ұзын сары» деп атайды. Осы сөздің мәнін түсінбейтін келін қайдан білсін. Үйге ұзын сары кісі келгенде «енем айтқан қонақ осы екен» деп көктемге сақтағанын түгел қазанға салған екен. Сол айтқандай, қыс құрсауынан енді шыққан ағайынға көкөністен бастап, бәрі керек. Бір-бірінің керегін біліп, маркетинг жасауды Елбасымыз өңір басшыларына талай рет айтқан. «Ұзын сарының» сыбағасын апара жатқан керуеннің бір мақсаты – осы. Бақтияр ТАЙЖАН, «Егемен Қазақстан». Оңтүстік Қазақстан облысы.