Әуежайлар қызметі талапқа сай болуы тиіс

Кеше Премьер-Министрдің бірінші орынбасары Бақытжан Сағынтаев Үкімет үйінде отандық әуежайларды дамыту мәселесі  бойынша кеңес өткізді, деп хабарлады Премьер-Министрдің баспасөз қызметі. Қазіргі уақытта республикада 20 әуежай жұмыс істейді. Олардың 12-сі мемлекеттік әуежайлар (8-і «Airport Management Group» ЖШС-нің сенімді басқаруында), 6-уы жекенің меншігінде, 2-уі концессияда. 2015 жыл ішінде әуежайлар шамамен 12 млн. жолаушыға қызмет көр­­сет­­ті. Қазақстаннан 82 бағыт бойынша халықаралық тасымалдар орын­­далады. Оларды 2 қазақстандық («Эйр Астана» және «СКАТ») және шетел­­дік әуе тасымалдаушылар жүзеге асы­рады. Ішкі әуе рейстерін 42 ба­ғыт бо­йынша 6 қазақ­стандық әуе компа­ния­лары орындайды. Республикалық бюджет қаржы­лары есебінен Қазақстанның 13 әуежайына жалпы сомасы 97 млрд. теңгеге қайта жаңғырту жұмыс­тары жүргізілді. Оның сыртында, 2015 жылдың қаңтарында «Нұр­лы Жол» мемлекеттік бағдарла­масы шеңберінде Астана қаласы әуежайы­ның жолаушылар терминалының құры­лысы басталды. Жобада қазіргі жұмыс істеп тұрған терминалды кеңей­ту және өткізу қабілетін жылына 7 млн. жолаушыға дейін жеткізу қарас­тырылған. Кеңес қорытындысы бойынша Ба­қытжан Сағынтаев отандық мемлекеттік органдар мен әуежай басшылығына авиациялық қауіпсіздік мәсе­ле­леріне назар аударуды, атап айт­қанда, жолаушылар тер­минал­дарында за­манауи тексеру жабдық­тарын орнатуды тапсырды. Сол сияқ­ты арнайы техникамен (өрт сөнді­ру машиналары, қар жи­нағыш және мұз­даққа қар­сы техника, баспалдақ­тар) жа­рақ­тан­дыруға айрықша көңіл бөлу қажет. Оның сыртында әуе­жайлар қызметінің  эконо­микалық тиім­ділігін ұлғай­ту, менеджмент дең­гейін арттыру, даму үшін жаңа қар­­жы көздерін тарту жолдарын із­дестіру бойынша ша­ралар қабылдау тапсырылды.