01 Сәуір, 2016

«Ақбөбек»

635 рет
көрсетілді
3 мин
оқу үшін
ақбөбек 5– жас таланттарды талпындырған байқау «Ақбөбек» балалар ор­талығында осы аттас ком­панияның ұйымдас­тыруы­мен биыл «Ақбөбек – ІІІ» республикалық балалар шығармашылығы байқауы өткізілді. Қазақстан Респуб­ликасының 25 жылдығына арналған бұл байқауда Астана қаласынан, Қызыл­орда, Аты­рау, Маңғыстау, Батыс Қазақстан және Ақтө­бе облыс­тарынан дарынды балалар бақ сынады. 985 бала қатысып, үш күнге созылған байқау вокал, музыкалық аспаптарда ойнау, хореография, шығарма жазу, мәнерлеп оқу және сурет салу номинациялары бойынша, жас ерекшеліктеріне қарай үш топта өткізілді. Байқау негізінен «Ақбөбек» республикалық балалар газетінің оқырмандары арасында ұйымдастырылды. «Шығарма» номинациясы бойынша бас жүлдеге кіші топ бойынша Ақтөбе облысы Темір ауданы Кеңесту орта мектебінің 3-сынып оқушысы Ақдәулет Көшкінбаев, орта топ бойынша Шалқар ауданы №1 мектеп-гимназия оқушысы Жансәуле Қа­натова, жоғары топ бойынша Темір ауданындағы Абай атындағы орта мектептің 8-сынып оқушысы Альбина Арғынбай ие болды. «Сурет» номинациясын­да жүлделі 1-орынды кіші топ бойынша Ақтөбе қала­сындағы №45 орта мек­тептің оқушысы Әділжан Башимов, орта топ бойынша №3 орта мектептің оқушысы Әділхан Дулат, жоғары топ бойынша Қарғалы өнер мектебінің оқушысы Ақдана Бақытқалиева жеңіп алды. «Хореография» номина­циясы бойынша бас жүлде Ақтау қаласынан келген Аяу­лым Қанатқалиға және Ақтөбе қаласының «Мега-Старс» халықтық би ансамбліне берілді. Домбырадан бас жүлдені Атырау облысынан келген Мадияр Жасанбаев, қобыздан ақтөбелік Айкүн Шанова, баян, аккордеон­нан ақтөбелік Камиль Аб­дул­залиев, фортепианодан Анас­тасия Кириченко, флейтадан бас жүлдені ақтө­белік Диана Дәуітова олжалады. Мәнерлеп оқудан бас жүл­дені атыраулық Әдия Нұри­ден, дәстүрлі әннен аты­рау­лық Әселхан Белгі жеңіп алды. Өз тобында биден бас жүлдеге ие болған тағы бір атыраулық оқушы Арайлым Молдашева «Аққу» биін әдемі билеп шыққанын жеткізді. Атырау қаласындағы ағыл­шын тілін тереңдетіп оқы­татын техникалық гимна­зияның бесінші сыныбында оқитын Арайлым болашақта дәрігер болғысы келетінін жасырмады, бірақ, өнерді жанына серік ететінін айтты. Ол би билеумен бірге дом­бырада да жақсы ойнайды екен. Осы байқауға қатысқан әр баланың бойы­нан осындай өнерге деген қызығушылықты аңғаруға болады. Мұны байқауды ұйым­дастырушылар да атап өтті. Байқау барысында «Ақбө­бек» республикалық газетіне жазылушылар арасында ұйымдастырылған ұтыс ойыны қорытындыланды.Байқау жеңімпаздары мен жүлдегерлеріне «Ақбөбек» компаниясы дайындаған дипломдар мен ескерткіш сыйлықтар тапсырылды. Сатыбалды СӘУІРБАЙ, «Егемен Қазақстан». Ақтөбе облысы.