Қазығұрт

Қазақта: «Қазығұрттың басында кеме қалған. Ол әулие болмаса неге қалған», – деп айтылатын әпсана бар. Нұх пайғамбардың кемесі қайырлаған дейтін аңыз-әңгімеге жұрт құлай сеніп, көп адамдар мереке күндері қасиетті таудың басына көтеріледі. Бұл жолы Оңтүстік Қазақ­стан облысы кәсіпкерлік, индус­триялық-инновациялық даму және туризм басқармасының ұйымдастыруымен 150 адам «Қазығұрт» шыңына шықты.  Ел тәуелсіздігінің 25 жылдығы мен «Наурыз» мерекесіне арнал­ған шараға тәжірибелі альпинистермен қатар, мектеп оқу­шылары, жергілікті жоғары оқу орындарының студенттері, ата-аналар балаларымен қатысты. Қазығұрт төбесінен қарап тұрған Алатаудай асқақ емес, теңіз деңгейінен 1761 метрдей ғана биік. Сондықтан, оның биігін бағындыру қиындық ту­ғызбайды. Оңтүстік Қазақстан об­лы­сы кәсіпкерлік, индус­триялық-инно­вациялық да­му және туризм басқармасының басшысы Марат Қарабаев: «Ел Тәуелсіздігінің 25 жылдығы әр қазақстандық үшін торқалы той. Дүние жүзінде ұлтарақтай да жері жоқ, әркімге кірме болып тозып жүрген ұлттар да бар. Ал, халқы шағын болса да Қазақстан жер көлемі жағынан әлемде алғашқы тоғыздыққа кіреді. Мұны жас ұрпақ біліп-өсуі керек. Отанын қадірлеуді, ата-баба аманатына адал, өз елінің патриоты болып өсуі үшін осындай бастамалар керек деп ойлаймын. Бұл сапарда бізбен бірге жас балалар да ере жүрді. Олардың жүзінен Отанына деген мақтаныш, ертеңге деген сенім, алаңсыз балалық шақ көрдік», – деді. Бақтияр ТАЙЖАН, «Егемен Қазақстан». Оңтүстік Қазақстан облысы.