Гүрзі жұдырықты жігіттеріміз

Олимпиадаға 10 жолдама алды Бокстан Қазақстанның ерлер құрамасы биылғы тамыз айында Рио-де Жанейрода өтетін жазғы Олимпиялық ойындарда толық құрамымен өнер көрсететін мүмкіндікке қол жеткізді. Бұл Қытайдың Цзяньан қаласында бүгін мәреге жететін азиялық олим­пиялық квалификациялық турнирдің барысында белгілі болды. Онда бұрнағы күні ой­нал­ған жартылай финалдық шайқас­тарының қорытындысымен – бес, ал кеше үшінші орын үшін болған қосымша шайқастардың нәтижесі бойынша тағы екі боксшы­мыздың Рио-де-Жаней­рода тамыз айында өтетін Олим­пиялық ойындарға жолдама алды. Олимпиадаға қыздарымыз арасынан бір ғана боксшы жолдамаға жетті. Ол – 75 килоға дейінгі сал­мақтағы Дариға Шәкімова тур­нирде кореялық Ким Шин-Хиеонг­тен, моңғол Эрденетуя Енкх­баатардан, КХДР спортшысы Жанг Ун-Хиуден 3:0 деген есеппен асып, финалға шық­ты. Ал ақтық айқаста қытай­лық Ли Кианмен қолғап түйістіреді. Жігіттеріміздің арасынан 75 килоға дейінгі салмақтағы Жәнібек Әлімханұлы кеше бірінші болып турнирдің алтын медалін мойнына орады. Ол кеше финалдық жекпе-жегінде алаң иесі – қытайлық боксшы Жао Минггангті айқын басымдықпен жеңді. Ересектер додасына енді ғана қосылған Абылайхан Жүсіпов те жаттықтырушылар сенімін ақтады. 64 килоға дейінгі салмақта сынға түскен ол Қытай жерінде үндінің мықты сайыскері Манож Кумарды (3:0), кореялық Лим Хиун-Чулді (3:0), австралиялық Давид Биддені (3:0) және қы­тайлық Ху Кианскунды (3:0) тізе бүктірді. Енді ақтық сында моңғол Баттарсух Чинзоригпен шайқасады. Бұдан кейін Әділбек Ниязымбетов (81 кг) пен Иван Дычко (+91 кг) осы жолдан өтті. Осы сапарда Әділбек кореялық Йанг Хи-Гуенді (3:0), сириялық Ала Алдих Чоссоунды (3:0) және түрікмен Азизбек Ачиловты (3:0) жолдан тайдырса, Иван Жаңа Зеландия өкілі Патрик Маилатаны 1-раундта нокаутқа түсіріп, иор­даниялық Хуссейн Ешайш Яшайшті 3:0 етіп тізе бүктірді. Бұрнағы күні жартылай финалда қарсыластарына есе жіберіп қойған тағы екі боксшымыз – Олжас Сәттібаев (52 кг) пен Қайрат Ерәлиев (56 кг) кеше Олимпия лицензиясын беретін үшінші орын үшін айқаста жеңіске жетті. Ал үш салмақ бойынша күш сынасатын қыздар құрамасында әзірге жалғыз жолдама болса, қалған екеуін биылғы 16-28 мамыр аралығында Астанада өтетін әлем чемпионатында толтырады деген үміттеміз. Руслан ИГІЛІК.