Қолдан келгеннің бәрі жасалуда

– Ғ.Мүсірепов ауданында орналасқан Шарық гидроторабы еріген қар суына толып, кеме­рінен асты. Соның салдарынан маңайындағы елді мекен тұр­ғындарын көшіру жұмыс­тары басталды, – деді қарғын судың ауа жайылуынан зардап шек­кен­дердің жайын білмек болып ха­бар­ласқанымызда облыс­тық төтенше жағдайлар департа­ментінің бас маманы Евгений Журавлев. Жергілікті билік орындарының, ішкі істер, төтенше жағдайлар бөлімдерінің жұмыла күш салуының арқасында су қоймасына тақау орналасқан Мәдениет ауы­лынан – 34, Гавриловка ауылынан 78 адам қауіпсіз жерлерге қоныстандырылыпты. Қардың күрт еруі салдарынан Аққайың ауданындағы Смирнов кентінің көшелерін су басқан. Басқа тұрғын үйлерге де қауіп туындаған. Астана қалалық өрт сөндіру және апаттық құтқару қызметінің өкілдері су айдауға жіті кіріскен. Шал ақын ауданына қарасты Жаңажол ауылында да күрделі жағдай қалыптасқан. Жылбысқы қармен бітеліп қалған су айдау арналары тазаланып, қауіпті жерлер инертті материалдармен нығыздалған. Су шайып кеткен Доброжанов елді мекенінің 48 тұрғыны басқа жаққа көшіріліп, барлық жағдай жасалған. Су тасқынынан Городецкое елді мекенін аман сақтап қалу мақсатымен 400 метр су арнасы тазаланып, бөгеттер тұрғызылған. Облыс басшысы Ерік Сұлтанов пен ІІМ ТЖК төрағасының орынбасары Жасұлан Жұмашев қызыл су басқан елді мекендерді әуеден шолып қайтты. Жер­гі­лікті тұрғындарды топан судан сақтауға бағытталған құт­қару жұмыстарымен танысты. Шағалалы өзенінің арнасына, Үлкен Тораңғұл, Бозарал, Ба­лықты, Сарыкөл көлдеріне, Сер­геев су қоймасына, Тайынша, Аққайың Есіл аудандарына бақы­лау жүргізілді. Атқарылып жатқан кешенді шараларға қарамастан қауіп әлі сейілер емес. Кешеден бері жауған жаңбыр жағдайды шиеленістіріп жіберген жайы бар. Өмір ЕСҚАЛИ, «Егемен Қазақстан». Солтүстік Қазақстан облысы.