Құптаймын және қолдаймын
Ядролық қарулану үдерістері жаңадан өрістей түсіп отырған жағдайда Қазақстан Президенті Н.Назарбаевтың Азия мен Таяу Шығыста ядросыз аймақ құру туралы ұсынысы үлкен маңызға ие. Қазақстанның соңғы 10 жыл ішіндегі антиядролық бастамаларын құптаймын және қолдаймын.
Қазақстан басшылығының кейбір елдердің жаппай қырып-жоятын қаруға қол жеткізуге ұмтылып, халықаралық қоғамдастықты тұрақсыздыққа итермелеп отырған жағдайында, осы қауіпті үрдістің кең қанат жаймауына аса үлкен үлес қосып отырғанын атап көрсеткен абзал. Орталық Азиядағы ядросыз аймақ мысалынан біз аталған шарттың өзінің қорғау қызметін орындап, Орталық Азиядағы барлық елдің қауіпсіздігін қамтамасыз етіп қана қоймай, оларды жаппай қаруланудан бас тартудан сақтандырып келе жатқанын көріп отырмыз.
Қазақстанның күш-жігері ядролық державалар арасындағы дүрдараздық тәуекелінің айтарлықтай төмендеуіне де оң ықпал етуде. Астананың қарусыздану, қарулануға бақылау жасау, ядросыз аймақтар құру және ядролық арсеналдарды қысқарту жөніндегі жаңа келісімдер жасасу бойынша белсенділігі басқа елдер үшін үздік үлгі болып табылады. Мен Қазақстан басшылығына аталған бастамаларды жүзеге асыруда табыстар тілеймін.
Аксель ФИШЕР,
Германия Бундестагының депутаты,
Еуропалық кеңестегі Еуропа халық партиясы фракциясының төрағасы.
Бас тарту бастамасы басқаларға үлгі
Ядролық қауіпсіздік жөніндегі саммит халықаралық қоғамдастықтың ядросыз әлем құру жөніндегі белсенділігінің маңызды темірқазығы болып табылады. Қазақстан Республикасының Президенті Нұрсұлтан Назарбаев мультиполярлы әлемнің тәуекелдерін, шын мәнінде, дөп басты.
Осы орайда айтқанда, Орталық Азияға географиялық жағынан жақын орналасқан Солтүстік Кореяның ядролық сынақтар жүргізуі бүкіл өңір үшін қауіпті сын-қатер болып қалып отыр. Сондықтан Қазақстан, еш қауіптенбестен, өзінің ядролық қарудан бас тарту үлгісін басқаларға ашық жариялап келеді.
Біз тек осындай жолмен ғана ұзақ мерзімді және орнықты әлемді қамтамасыз ете алатын боламыз.
Александр РАР,
журналист, саясаттанушы, көсемсөзші.
